Shillong, Risaw 31
Ka Synjuk ki Rangbah Shnong jong ka Ri Bhoi District ka la pynpaw ba kam don satia kano-kano ka jingpyrshah ban pynlong ïa ka tamasa Cherry Blossom ha Ri-Bhoi District.
“Kum ka Synjuk ki Rangbah Shnong na Ri Bhoi, ngim don satia ka jingpyrshah halor ka jingpynlong jong ka Sorkar Jylla ïa ka tamasa Cherry Blossom ha Ri Bhoi,” la ong u General Secretary ka Synjuk u Bah PB Sylliang haba kren sha ki lad pathai khubor hadien ka jingïakynduh ïa u Myntri ka tnat ki Kam Jngohkai pyrthei u Bah Paul Lyngdoh ha ka Sngi Ba-ar ha Secretariat.
“Ngim don satia ka jingpyrshah ïa katei ka tamasa ban pynlong da ka Sorkar mynta u snem namar kumba ka long mynta ka dei kaba la dep ban pynbit pynbiang lypa bad ruh ba la dep ban pynbeit tarik lypa,” u la ong.
Ha kajuh ka por, une u nongïalam ka Synjuk u la ong ba kum ki Rangbah Shnong ka Ri Bhoi kin sa peit pat ha u snem ban wan, ba na ka liang jong ka Sorkar kan hap ban peit bad pynbeit lypa ïa ka tarik ban pynlong ïa ka tamasa khnang ba kan nym pynmong ïano-ïano ruh.
“Ïa mynta hi na ka liang jong ka Synjuk ngim don kano-kano ka jingpyrshah, hynrei ngin sa pyrshah ïa ka ban sa wan lada kin dang bteng ban leh kumjuh. Kumba ka long mynta, ngi la ïoh jingtip ba ïa ki tarik la dep ban buh bad ruh ïa ki tiket bad baroh ki jingdonkam la dep ban pynïaid shaid-shaid shakhmat, kumta ngim lah leh eiei shuh,” u la ong.
Haba kylli haba don ki kynhun kiba la pynpaw ka jingpyrshah ban pynkut ha ka Sngi U Blei, u Bah PB Sylliang u la ong, “Hooid, kita kiba pyrshah ruh ki don ïa ka hok ban pyrshah. Ngi kum ka Synjuk ngi ïeng pdeng bad ai ba kane kaba la pynbeit da ka sorkar kan long kaba ïaid beit ïaid ryntih namar na ka liang jong ka Dorbar Shnong ka la dep ban ai jingbit.”
Kane ka tamasa Cherry Blossom kaba lai sngi kynthih kan sdang naduh ka 17 tarik bad kut haduh 19 tarik u Naiwieng ïa kaba yn pynlong ha Lumdaitkhla, Bhoirymbong, Ri Bhoi District.
