Shillong, Risaw 31
Kumba ju long man la u snem, ka Hima Khyrim ka ju pynlong ïa ka shad ainguh ha ryngkat ka jingpom ïa ki blang ha phyllaw Ïingsad ha Smit kiba ju wanrah na ki Raid bad ki shnat Raid bapher bapher jong ka Hima.
Mynta u snem ruh, ka Hima Khyrim ka pynlong ïa kane ka lehniam bad ka shad ainguh kaba ju tip paidbah kum ka Shad Nongkrem kaba sdang da ka Pomblang Ïewduh ha ka 1 tarik Naiwieng bad pynkut da ka Pomblang Lyngka ha ka 2 tarik Naiwieng.
Napdeng ki Raid ka Hima Khyrim kiba ju shimbynta ha ka niam ka rukom, ka Raid Mawlieh ha ryngkat ki shnat Raid hapoh jong ka, ka dei kaba ju lum ju lang ïa ki blang bad ki jingai sngewbha lane ki bhet ban pynpoi sha ka Ïingsad Ïingsunon jong ka Hima sha Smit hashwa ban sdang ka shad ka kmen bad ka jinglehniam.
Kumta ka Raid Mawlieh ha ryngkat ki 11 tylli ki shnat Raid ka la pynlong ïa ka jingïakynduh lang ha Mawlieh ha Lyngkyrdem ha ka 31 tarik u Risaw, 2023 ha kaba la wanrah ïa ki blang shi jaka ha kaba ka Raid Mawlieh lem bad ki shnat Raid ki la aiti ha u Lyngdoh jong ka Raid ban shimti ïa ki 12 blang ban leit rah pat sha ka Hima Khyrim ban pyndep ha kitei ki ar sngi jong ka shad ka kmen bad lehniam kaba shisien shisnem.
Ha kane ka sngi, u Lyngdoh ka Raid Mawlieh u la shimti ïa kine ki 12 tylli ki blang ha ryngkat ka kren ka khana bad ki kyntien duwai haba u shimti ïa ki blang ki tyllai bad ki bhet, kiba long 12 tylli ki blang ba la wanrah na ka Raid Mawlieh kum ka kmie Raid lem bad ki 11 tylli ki shnat Raid.
Kine ki 11 tylli ki shnat Raid ki long ka shnat Raid Wahkhen, Nongkhlieng, Nongblai, Mawja, Mawlam, Nongshken, Lyting Nongsohphan, Nashain, Pyrjat, Shatwiat bad Ri Hynriew Kur.
Hadien ba dep ban shimti ïa ki blang bad ki bhet, u Lyngdoh ka Raid Mawlieh u Bah Firmly Lyngdoh u la ong ba kane ka jinglumlang ïa ki blang 12 lynti ka long ban don ka jingryntih ha ka rukom wanrah ïa ki blang bad ki bhet na la kijong kijong ki shnat Raid ban pynpoi sha tyngkong ka Ïingsad Ïingsunon ka Hima ha ka sngi ban pyndep ïa ka pomblang.
U Lyngdoh u la ong ba kine ki blang bad ki bhet (jingai sngewbha) kin poi sha ka Hima ha ka miet Bujai Blang kaba dei ha ka step synïa jong ka sngi Lyngka ban pyndep ïa ka niam ka rukom hashwa ka Pomblang Lyngka.
Ha kane ka sngi ba aiti ïa ki blang bad ki bhet, la sakhi ïa ka jingdon lang ki nongkitkam ka Raid Mawlieh bad ki shnat Raid kiba la ai jingkren lyngkot ruh hashwa ban ïaid ka jingaiti ïa ki blang sha u Lyngdoh.
Ha kane ka sngi, la donlang ruh u Myntri ka Raid Lawai jong ka Hima Khyrim u Bah B. Sohtun lem bad ki briew na ka tnat Elaka ka KHADC kiba la sakhi ïa kane ka jingpyndep ïa ka riti ka dustur kaba don hapoh ka Raid Mawlieh jong ka Hima Khyrim.
La pynïaid ïa ka jingïalang kaba lyngkot da u Bah M. Khongsti uba dei u Treasurer ka Dorbar Shnong Lyngkyrdem ha kaba la ïoh ruh ka jingkren na u Sordar ka shnong Lyngkyrdem uba la pdiang sngewbha ïa baroh ki shnat Raid kiba la wanrah ïa ki blang, nalor u Myntri ka Raid Mawlieh, Bah Shemborlang Khongsngi bad kiwei kiwei ki rangbah na ki shnat Raid, nalor u Rangbah Kur, B. Khongsti.
La ong ba kane ka jingleh ka Raid Mawlieh kan long ka nuksa ban pyni sha ki pateng-pakit bad yn nang kham lah ban pynjanai ha ki snem ban wan khamtam hapoh ka Hima Khyrim kaba dei kawei na ki Hima kaba pynneh ïa ka riti ka dustur bad kiba dang bat ïa ka lehniam haduh mynta.
La ïoh ruh ka jingkren na u Secretary ka tnat Elaka, KHADC, Bah Sharailang Lamare nalor ka jingkren na u Myntri Sohtun jong ka Raid Lawai.
U Myntri Sohtun ha ka jingkren jong u, u la banjur ban don ki nongthoh ki ban thoh kot bad buh ryntih haba ïadei bad ki Raid kumjuh ruh ka Hima Khyrim khnang ba ki longdien kin tip ïa ka mynnor bad ïa ka mynta.
U la ïaroh ïa ka Raid Mawlieh kaba la lah ban leh ïa kane ka jingshimti ïa ki blang ki bhet kaba u la ïoh ban sakhi, bad u kitbok kitrwiang ïa ki khun ka Raid Mawlieh.
