Gaza, Risaw 31 (UNI)
Palat 8 lak ngut ki nong Palestine ki la mih na ki ïing ki sem bad ki shnong ki thaw kiba don ha ka thaiñ Shatei jong ka Gaza Strip hapdeng ka jingjur jong ka jingïakhun hapdeng ka Hamas bad ka Israel, la ïathuh u nongaiktien ka Israel Defense Forces (IDF), u Jonathan Conricus, ha ka Sngi Ba-Ar.
“Sngewkmen ban ïohi ba palat 8 lak ngut ki nong Palestine ki la mih noh na ka thaiñ Shatei kaba dei ka jaka pdeng jong ka jingïakhun,” la ong u Conricus.
Nalorkata, u la ong ba ka Israel kan shim ïa ki sienjam ban pynkloi ïa ka jingpynpoi ïa ki lad jingïarap sha ki bynta ba Shathie jong ka Gaza Strip.
U nongaiktien ka UN, u Stephane Dujarric, ha ka Lah Sngi u Blei u la ïathuh ba naduh ba sdang ka jingïakynduh, palat 1.4 million ngut ki nongshong shnong ki la hap ban mih noh na ki ïing ki sem jong ki kiba don ha Gaza Strip.
Lah ban kdew ba ki lehnoh Hamas ki la thombor ïa ka Israel ha ka 7 tarik Risaw da kaba siat naphang ïa ki nongshong shnong na ki ktang suloi bad da kaba pynher ïa ki ‘nam ding. Na ka liang ka Israel ka la pynphai kylla da kaba ther da ki bom nalor suiñ ïa ka Gaza bad ka la pynsangeh ruh ïa ka jingsam umbam, bording bad umphniang sha Gaza.
Ha kawei pat ka liang, ka jingïap jong ki nongshong shnong ha Gaza Strip na ka jingthombor ka Israel ka la kot sha palat 8,500 ngut katba palat 21,000 ngut ki la mynsaw, la ïathuh ka tnat ka koit ka khiah jong ka Palestine ha ka Sngi Ba-Ar.
Kane ka tnat ka la pynbna ba kiba la ïap ki don 8,525 ngut, kynthup ïa 3,542 ngut ki khynnah bad 2,187 ngut ki kynthei katba 21,543 ngut ki la mynsaw.
