Shillong, Risaw 31
Hadien ka jingpyllait ïa kawei ka sur kren da kawei ka lad pathai khubor lyngba ka phone ba la rekod hapdeng u President ka Hynñiewtrep National Youth Front (HNYF) East Khasi Hills District, u Bah Bless Dkhar bad uwei u briew ïa uba la buhrieh kyrteng, ha kaba ha katei ka rekod sur la ïohsngew ba utei u President ka HNYF u la dawa pisa T. 1,500 na kawei ka trok ban pyllait ïa ki ban ïaid lyngba ka jingkieng Damsite haduh ha Mawlai bad kiwei kiwei ki jaka. Kumta na ka liang ki pulit ka East Khasi Hills ki la kem noh ïa utei u President hynnin ka miet ka 30 tarik u Risaw, 2023 ha ka por 9 baje bad ka jingtohkit halor kane ka dang ïaid shakhmat.
Katkum ki tyllong khubor la ïathuh ba ki pulit nalade ki la ai hi da ka ejahar pyrshah ïa u Bah Bless namar ka jingpynkheiñ jong u ïa ka hukum jong ka ïingbishar da kaba lum pisa be-aiñ.
Nalor nangta ki tyllong khubor ki ïathuh ruh ba mynta u Bah Bless u dang don ha thanat Sadar bad yn sa rah ïa u sha ïingkashari ban pan por ban tohkit ïa u.
Hadien ba ki pulit ka East Khasi Hills District ki la kem noh ïa u President ka Hynñiewtrep National Youth Front (HNYF) East Khasi Hills District, u Bah Bless Dkhar ha ka miet jong ka 30 tarik u Risaw 2023 na Pohkseh, na ka liang ki pulit ha ka sngi kaba bud kata ka 31 tarik u Risaw ki la rah noh ïa utei President sha ïingkashari jong ka District & Session Judge, East Khasi Hills District.
Na ka liang ka ïingkashari District & Session Judge ka East Khasi Hills ka la ai por lai sngi kynthih ïa ki pulit ba kin tohkit ïa utei u President ka HNYF khnang ban lap dien shuh sa kiwei pat kiba donkti lang ban leh ïa kane ka kam.
Ka jingshah kem jong utei u President ka dei halor ka jingkynnoh ba u la donkti ban pynïaid ïa ki trok kit mar kiba kit palat pud na jingkieng Damsite da kaba lum pisa T. 1,500 na kawei ka trok.
Shuh shuh katkum ki tyllong khubor kiba ka ïohlum ka long ba na ka liang ki pulit ki la pan por haduh 7 sngi ban tohkit ïa utei u President, hynrei na ka liang ka ïingkashari pat ka la ai por tang lai sngi.
