Nongpoh, Risaw 31
Ka Khasi Students’ Union (KSU) North Khasi Hills District Unit ka la pynpaw ïa ka jingsngewkhia jur halor ka jingjaboh jong ka lyer ha ki thaiñ Byrnihat kumba la pynmih da ka Central Pollution Control Board (CPCB) ha ka 25 tarik u Risaw kaba pynpaw ba ka Byrnihat ka poi haduh 302 ka Air Quality Index (AQI) kaba la tam ruh wat ïa ki sor bah kiba heh kum ka Delhi, Mumbai bad kiwei kiwei ha ka ri baroh kawei.
U President Bah Ferdynald Kharkamni haba pynpaw ïa ka jingsngewkhia halor kane ka kaiphod kaba pyni shai ba ki paidbah ha katei ka thaiñ ki hap ban ring mynsiem ïa ka lyer jaboh kaba ktah jur ïa ka koit ka khiah jong ki paidbah ka thaiñ.
Haba shim khia halor kane ka bynta, u Bah Ferdynald u la ong ba da ka mynsiem jong ka jingsngewkhia jur, ka seng shen kan sa kynduh ban ïakren bad ki nongïalam shnong jong ka thaiñ Byrnihat ban ïathir sani halor katei ka jingeh kaba ki paidbah ki mad bad kynduh ban shim ïa ki sienjam kumno ban weng ïa katei ka jingeh jong ki paidbah.
U Bah Ferdynald u la pyntip ruh ba na ka liang ka seng kan sa leit ruh ban kynduh ïa ki bor sorkar jong ka jylla Assam ban ïakren halor kane ka bynta, naba kumba la ïohi, ka jingdon bun jong ki karkhana ha ki bynta ba hap sha ka jylla Assam mar shiliang na ka surok bah ka dei kawei na ki dawbah jong katei ka jingpynmih ïa ka lyer jaboh.
U la ïathuh ba sha shiliang jong ka surok kaba hap sha ka jylla Assam ki duna ki ïing ki sem bad bun pat da ki karkhana, katba sha ka liang jong ka jylla Meghalaya pat ki don bun ki ïing ki sem bad ki nongshong shnong. Kumta ka jingthmu jong ka seng ka long ban ïakren bad ka sorkar Assam na ka bynta ban khang khyrdep noh ïa kitei ki karkhana kiba don ha shi lynter jong ka thaiñ Byrnihat.
