Shillong, Naiwieng 01
Ar ngut ki briew ki la shah rai pynrem ha ka Ïingkashari namar ka jingdonkti ha ka kam runar ban leh be-ijot ïa kawei ka khynnah skul ha u snem 2017. Kine ar ngut ki ngat ha ka saja da kaba shah set patok 14 snem kynthih.
Ïa kane ka rai la pynmih da ka Ïingkashari Special Judge (POCSO), East Khasi Hills Shillong lyngba ka nongbishar, ka Swapna G Momin ha ka 27 tarik Risaw, 2023 ha kaba ar ngut ki briew ba la tip kyrteng kum u Mortonjune Kharbani bad uwei pat u Lumding Syiemlieh, la pynngat ha ka saja kaba dei ban shah set patok 14 snem lem bad ka kuna kaba T. 50 hajar.
Ha u kyrwoh ba la pyllait da u SP ka East Khasi Hills District, Bah Sylvester Nongtnger, la ong ba ha ka 03/12/2018, la ïohpdiang ïa ka ejahar ha ka Thanat Mawngap ha kaba kawei ka khynnah kaba dang 13 snem ka rta bad dang pule klass VII ka la shah leh be-ijot ha u Mortonjune Kharbani (45-50 snem ka rta). La ong ba ka la ngat ha kane ka apot la bunsien ha u snem 2017 ha ka por ba ka don marwei hapoh ïing.
Kumta la pynrung ïa ka ejahar ha Thanat Mawngap ha ki kyndon babun tylli kynthup hapoh ka aiñ POCSO ha kaba ïa kane ka kam la shimti ban tohkit da ka SI, Kong Larisha Kharjana.
La ong ba ha ka por ba dang tohkit, la nang paw shuh shuh ba kane kaba shem lanot ka la ngat ruh ha uwei pat u briew uba kyrteng u Lumding Syiemlieh.
Kumta ynda la dep lut ka jingtohkit, la pynngat ha ka jingkynnoh pyrshah ïa kitei ar ngut ha ka 28/01/2019.
Ynda la dep ka jingtian bishar ha Ïingkashari Special Judge (POCSO), East Khasi Hills, Shillong, lyngba ka nongbishar Swapna G. Momin, ka Ïingkashari ka la pynmih ïa ka rai ha ka 27 tarik Risaw, 2023 ha kaba la rai pynrem bad pynngat baroh ar ngut ban shong patok 14 snem kynthih ha ryngkat ka kuna kaba long T.50 hajar marwei namar la lap ba ki donbynta ban leh kam runar.
