Shillong, Naiwieng:
Ka Synjuk ki Rangbah Shnong ka Ri Bhoi District ha ka Sngi Ba-ar ka la leit ban ïakynduh ïa u Myntri ka tnat Revenue u Bah Kyrmen Shylla ban pynpaw hakhmat jong u, ïa ka jingeh kaba ïadei bad ka kam ‘register’ jaka, naba ka bai ‘register’ jaka ka long kaba rem haduh katta katta, kaba la pynlong ïa ki briew ba shong ha khappud ban leit register ïa la ki jaka sha Assam.
“Kumba ka long mynta, ka bai register ïa ka jaka puta hapoh ka Ri-Bhoi District ka long kaba rem haba ïanujor bad ka bai thied jaka thymmai bad kane ka la pynlong ïa ki briew ba don jaka khamtam ha khappud ban leit ‘register’ ïa la ki jaka sha Assam,” la ong u General Secretary ka Synjuk u Bah PB Sylliang hadien ba la dep ban ïakynduh ïa u Myntri.
“Ha kane ka jingïakynduh ïa u Myntri, ngi la ïoh ban pynsngew ha u halor kane ka jingeh bad ha kaba ngi la buh ka jingdawa ba dei ban pynduna noh ïa ka dor jong ka bai ‘register’ ïa ki jaka ki puta hapoh ka Ri Bhoi District,” u la ong.
U Bah PB Sylliang u la ong ba ka long shisha kaba lyngngoh ba kumno kan rem ka bai ‘register’ ban ïa ka bai thied jaka bad ïa kane la sakhi ba haba leit ban ‘register’ jaka ha ophis DC, ka la ïapher bak-ly-bak, naba ka jaka ba la thied ha ka dor T.2 lak katba ka bai ‘register’ pat la hap ban siew haduh T.2.5 lak ne T.3 lak.
Une u nongïalam ka Synjuk u la ong, namar ka jingrem palat jong ka bai ‘register’, kiba bun ki briew ba sah ha khappud kim leit shuh ban ‘register’ ïa ki jaka ki jongki hapoh ka ophis u DC Ri Bhoi hynrei ban leit ‘register’ ïa ki jaka sha Assam ka bym shim pisa satia hynrei ban ‘register’ ei.
“Kiba bun ki jaka ha Ri Bhoi ki dei kiba ïoh pateng na ki kmie ki kpa bad kumta ter ter hynrei ban ‘register’ ïa ki jaka hap ban lut da ki phew lak,” la ong u Bah Sylliang.
“Ngi la pynsngew ha u Myntri Sorkar ba lada long kaba lah, ka sorkar jylla ka dei ban pyllait noh ne ban shim noh ha ka dor kaba rit khnang ba kan pynshlur ïa ki trai jaka ha khappud ban ‘register’ ïa ki jaka jong ki sha Meghalaya,” u la ong bad bynrap ba na ka liang u Myntri u la pynpaw ba un sa shimkhia halor kane bad ba un sa rah ïa kane ka mat sha ka jingïalang jong ka Kynhun Myntri ban ïoh ïakren ha kaba ïadei bad ka dor ka mur bai ‘register’ jaka.
