Shillong, Naiwieng 01
U Symbud Myntri Rangbah ka jylla, Bah Prestone Tynsong u la ong ba mano-mano kim dei ban long halor jong ka aiñ lada dei ki kynthei ne ki shynrang ne kino-kino ki seng ne ki kynhun ruh.
Kaba la pynlong ïa u Symbud Myntri Rang-bah ban kren kumtei ka dei hadien ka jingdon jong ki katto-katne ngut ki briew bad ki kynhun kiba la dawa pisa ha ka kyrteng jong ki seng bad kum ki riewshimet na ki trok kiba ïaid lyngba na ka surok Damsite, na ki dukan bad kumjuh na ki nongkhaïi.
Kum ban shu kdew hangne, ki pulit ka East Khasi Hills District ha ka miet jong ka 30 tarik u Risaw, 2023 ki la kem noh ïa u Bah Bless Dkhar uba dei u President ka Hynñiewtrep National Youth Front (HNYF) East Khasi Hills District hadien ka jingdonkti ban dawa pisa T. 1500 ban pyllait ïa ki trok na jingkieng Damsite ter ter shaduh Mawlai.
Dang shen, ka tnad pulit ka East Khasi Hills District ha ka 26 bad 27 tarik u Risaw, 2023 ki la ïoh ban kem haduh 8 ngut ki briew kiba donkti ban dawa pisa na ki dukan bad ki nongkhaïi ha ka kyrteng jong ki seng bad ha ka 27 tarik ruh, ki bor pulit ka EKHD ka la pyntip ba ka Special Cell ka la ïoh ban kem sa 4 ngut ki briew ba kynthup ïa kawei ka kynthei kiba la donkti ban dawa pisa na ka dukan na Ïewduh.
Haba kren sha ki lad pathai khubor ha ka Sngi Balang, u Bah Prestone u la ong ba mano-mano kim dei ban tam pud da kaba leh ïa kino-kino ki jait kam kiba long beaiñ bad kiba pynkheiñ ïa ka aiñ.
“Sngewbha ban long adkar ban burom ïa ka aiñ bad ban burom lem ïa ki paidbah jong ka jylla Meghalaya ka jong ngi”, la ong u Symbud Myntri Rangbah.
U Bah Prestone u la ong ba haba ka sorkar ka kem ïano-ïano ruh, ka kem beit ïa ki runar la ki dei na kano-kano ka seng ne ym dei na ka seng ruh, hynrei haba ka sorkar ka kem, ka kem beit ïa ki runar kiba leh ïa ki kam kiba long beaiñ.
“Ngin pyntikna ba kan nym don shuh kum kane ka jingkhrong beaiñ bad ka jingïaleh beaiñ ha ki bynta ki bapher bapher”, la kubur u Symbud Myntri Rangbah.
