Ki nongtrei 108 kin ïoh ki jingmyntoi bathymmai ki bym pat ju ïoh mynno-mynno: Dr. Ampareen

Shillong, Naiwieng 01

Ka Myntri ka tnad ka koit ka khiah ka Sorkar Jylla, ka Dr. M. Ampareen Lyngdoh ha ka Sngi Balang ka la ong ba ka jingtreikam jong ka 108 kan pher nangne shakhmat bad ka kompeni ka ban shimti pynïaid ïa ka, ka la don lypa ïa ka Human Resource Policy (HRP) ka ban ïada ïa ka hok jong ki nongtrei.

“Hynnin ka sngi nga la ïoh ban ïashong bad ki nongtrei 108 hadien ba ngi ïohi ïa ka jingkhlieh dor kaba la long – ngi ïohi ba baroh ki kompeni kiba wan na bynta ka ‘tender’ ki don ïa ka HRP kaba biang bha ban ïada ïa ka hok jong ki nongtrei,” la ong ka Dr. Lyngdoh haba kren sha ki lad pathai khubor.

Ka la ong ruh ba baroh ki kompeni ki la kular ban ai ïa ka jingsynñiang ha ka liang ka baibam, ka jingïarap sha ki nongtrei lada don ki jingjia aksiden, ka shuti ïa ki longkmie armet, kiba ïoh khyllung bad ki bym lah shuh ban shong ha ki kali kit nongpang.

Ka la ïathuh ba ha katei ka jingïakynduh bad ki nongtrei 108, la ïakren ruh halor ka jingpynkiew tulop ka bym duna ïa ka 7% shisnem.

“Ki nongtrei ka 108 kin ïoh ïa ki jingmyntoi bathymmai ki bym pat ju ïoh mynno-mynno,” ka la ong.

Na ka liang ka Myntri ka la pynsngew ruh ba yn sa kyntiew ha ka liang ka jingdon ki kali, kata man ki Block bad distrik bathymmai ki dei ban don kawei ka kali bad ki kor teknoliji ki ban pyndonkam ha kitei ki kali kin long kiba kham pher na kiba ju don.

“Kin don ïa ki kor ki ban pynïasoh ïa ki kali sha ki PHC, CHC, Civil Hospital lane ki jaka sumar shimet. Kan don ruh ka lad pynïasoh kaba kham pher ha kine ki jingtreikam ba mynta. Kine baroh ki dei na bynta ka jingbha jong ki nongshong shnong ka Jylla,” ka la ong.

Ka Dr. Lyngdoh ka la ai ruh ka jingkular bad ka jingkyrmen skhem ïa ki nongtrei ba kim dei ban don ka jingartatien halor ka jingwan shimti jong kawei pat ka kompeni.

Ha kawei ka liang, haba kdew ba ki nongtrei kin hap ban leit shah hikai, ka la ong, “Ki kor teknoliji ba mynta kin kham ïapher na ki barim bad ngi la pynsngew sha ki ba kin hap hikai shuh-shuh da kaba leit sha ki jaka ai jinghikai.”

Shuh shuh ka la bynrap ba ka jingsiew tulop kan shong ha ka jingshemphang ha ka kam ba ki la trei bad kan don ruh ka jingpynkiew tulop kaba na ka por sha ka por.

Nalor kane ka la ong ba kan don ruh ka jingai khusnam ïa ki nongtrei kum ka jingithuh ïa ka jingsynñiang jong ki sha ka kam.

“Ka 108 kan pher nangne shakhmat,” ong ka Myntri.