Shillong, Naiwieng 01
Ha ka step jong ka Sngi Balang, ki pulit ka East Jaiñtia Hills ki la ïoh ban kem noh ïa uwei u nongkhaïi drok na ka thaiñ Lad Rymbai Datsympein bad na ka met jong u, la ïoh ban kurup haduh 2 kilo u dawai kuli Amphetamine.
Ha ka kyrwoh na u Superintendent of Police ka East Jaiñtia Hills la ong ba ka jingïoh kem ïa une u nongkhaïi drok ba la tip kyrteng u Sanju Singh, uba shong ba sah ha Them Metor ka la long hadien ka jingïoh ïa ka jingtip kaba tikna ba une u briew un wan na Silchar da kawei ka Night Super kaba don ïa u nombor AS20-9990 ryngkat bad ki jingdih buaid.
Kumta mar ïa ïoh jingtip, ki pulit ki la pynïeng ka khyrdop talasi ha surok NH-6 ha Ladrymbai Datsympein hajan ka Hill View Restaurant bad dei ha ka por 5 baje mynstep la ïoh bat noh ïa kane ka bos.
Haba la pynlong ïa ka jingtalasi, ki pulit ki la ïoh ban kurup ar tylli ki pla na ka met jong u Sanju, kawei kaba ïong bad kawei kaba jngum. Haba la talasi ïa kine ki pla, kata na ka pla ïong la lap 3 tylli ki song rong ktieh bad haba la plied ïa kine song la lap haduh 149 tylli ki song rit. Hapoh kine song ki don ki dawai rong soh bad rong saw blad, bad haba la peit bniah la lap ba ki dei ki dawai kuli Amphetamine kiba khia haduh 2.771 kilo nalor la ïoh ruh ban kurup noh kawei ka mobile.
Ïa une u briew ba la ïoh kem, la pynrung case ha thanat Khliehriat bad pynngat hapoh ka kyndon NDPS Act bad ka jingtohkit mynta ka la ïaid shakhmat.
