Shillong, Naiwieng 01
Ka JAC jong ka North Eastern Hill University (NEHU) ha ka Sngi Balang ka la dawa na u Vice-Chancellor (VC) ka skulbah, u Prof. P.S. Shukla ban pynmih ïa ka shithi weng kam pyrshah ïa u Technical Officer/Senior Consultant shuwa ka shiteng sngi jong ka 3 tarik mynta u bnai.
“Ka JAC ka la rai ban pynkhlaiñ shuh-shuh ïa ka nongrim jong ka pyrshah ïa u VC bad ban pynbor ïa u ban pynmih ïa ka shithi weng kam shuwa ka shiteng sngi jong ka 3 tarik, Naiwieng haba ïadei bad ka jingthung be-aiñ ïa u Technical Officer/Senior Consultant uba la shah pynmih na la kamra treikam ha ki dkhot ka JAC ha ka jingïalang General Assembly kaba la pynlong ha ka 31 tarik Risaw, 2023,” ong ki nongïalam ka JAC ha ka kyrwoh khubor.
Ha kajuh ka por, ka JAC ka la buh jingkylli ïa ka nongrim jong u VC halor katei ka jingkynnoh thung kam be-aiñ hadien ba ka jingïalang General Assembly ka la lah ban pyneh bad ïakhun halor ki jingdawa jong ka.
Halor ka jingkam u VC sha ki lad pathai khubor, ba ka jingthung ïa u Rohit Prasad ka long ha ka lynti jong ka aiñ, ka JAC ka kwah ban tynjuh ïa u VC sha ka jingïatyrko nia hakhmat ki lad pathai khubor ha ryngkat baroh ki kot ki sla kiba u VC u kam ba u don.
“Kum ka jingbteng hadien ka jingseisoh jong ka jingïalang General Assembly kaba la pynlong ha ka 31 tarik Risaw, 2023, ka kynhun Executive jong ka JAC ha ka jingïalang kaba la pynlong ha katei kajuh ka janmiet, ka la pynbeit ban nang pynjur shuh-shuh ïa ka jingïakhih da kaba pynlong biang sa shisien ïa ka jingïalang General Assembly ha ka 3 tarik Naiwieng, 2023 ha ka por 3:30 baje mynsngi hakhmat shlem treikam u VC,” la ong ka komiti.
Shuh shuh ka la bynrap ba ha katei kajuh ka jingïalang jong ka JAC, la rai ruh ba namarba ka komiti ka ïakhun kum kawei ka kynhun, kumta baroh ki jingdawa ba la buh hakhmat bad ka jingai por ba la buh ha shuwa da ka NEHUTA, NEHUNSA bad NEHUSU la kynthup hapoh ka komiti bad mynta kine baroh ki la kylla long ki jingdawa bad jingai por jong ka JAC.
