Tura, Naiwieng:
Kumba 157 ngut ki nongtrei kontrak kiba trei ha ki kam bapher-bapher ha ki jaka sumar bapher-bapher ka Jylla, ki la shah weng noh na ka kam hadien ba ka tnad (Medical) kam shym la kwah shuh ban pynthymmai ïa ka kontrak jong ki.
Baroh kitei 157 ngut, ki la shah thung ha ka tnad ha ka por COVID – 19 bad ki la bteng ïa ka kam kum ki ‘Lab Technician’, ‘Blood Bank Operator’ bad ‘Emergency Worker’ tat haduh ba kin da shah pynbor ban mih noh na ka kam.
Kaei kaba kham sngewlyngngoh shuh-shuh ïa ki nongtrei ka long ba kim pat ïoh satia ïa ka tulop kaba 6 bnai tat haduh ba kin da shah weng kam.
Katkum ki tyllong khubor, ki nongtrei ki la shah weng noh na ka kam ha u bnai Nailur hadien ba kiba bun ki jingpyrshang na ka tnad DHS ban pynneh ïa ki ha ka kam, kam shym la long kaba seisoh.
Kham ha shuwa kiba kum kine ki jingmih la mad da ki hajar ngut ki nongtrei hapoh ka tnad hadien ba ka jingma na ka COVID ka la kut. Hynrei kiba bun ki dang neh ha ka kam ha Ri-lum Khasi-Jaiñtia bad Garo ban pynbha ïa ka jingshakri.
Naduh ka jingmih noh jong ki, ka jinglong-jingman ha ki Civil Hospital bad CHC bapher-bapher ka la long biang kumjuh kumba la long shuwa jong ka por COVID.
Kumba ka long, hadien ba kiba bun ki nongtrei COVID – 19 ki la shah weng kam, kiba la neh kim shym la long shuh kita ki shipai COVID. Ka kam jong ki ka la kylla sha ka ‘Emergency Care Service’ kaba pyni ïa ka jingsynñiang ba radbah jong ki ha ka jingshakri.
“Katba ki kam kyrkieh bad kito ba ïadei bad ka ‘Laboratory’ ha shuwa ka long 24 kynta, mynta ki la hiar sha ka 12 kynta namar ka jingduna nongtrei. Kiba bun tylli ki dorkhas la dep phah sha ki bor ba dei khmih na bynta ban pynjlan ïa ka kontrak jong kine ki nongtrei hynrei imat kane kam dei ka mat kaba hakhmat eh jong ka Jylla. Kumta la weng kam noh ïa ki,” ong ki tyllong khubor na ka tnad ‘Medical’ ki bym shym la kwah pynpaw kyrteng.
Halor ka jingbym siew ïa ka tulop sha ki, kitei ki nongtrei ba shah weng kam ki la dep thoh ruh sha u Myntri Rangbah, u Conrad Sangma, ha kane ka taïew ba la dep ban kyrpad pyllait noh ïa ka tulop ba sahteng. Hynrei ym shym la don kano-kano ka jubab halor katei ka bynta haduh mynta.
“Ngi la shah beh kam bad mynta ym shym la siew ïa kaei kaba sah sha ngi. Kane ka pisa ka lah ban ïarap ïa ngi ha kane ka jinglong-jingman tat haduh ban ngin da lah ban leh eiei da kumwei pat. Mynta ym don ba tip lano yn pyllait ïa ka jingsiew ba sah jong ngi ne la kin pyllait ne em. Kane ka pynlynga-pisa ïa ngi,” la ong uwei na ki nongtrei ba shah beh kam u bym treh pynpaw kyrteng.
Katkum ka jingïathuh ki heh ophisar jong ki jaka sumar bapher-bapher, la khmih lynti ba kiba bun ki kam thymmai kin sa shah ktah namar katei ka jingshah beh kam ki nongtrei kontrak.
Na kitei 157 ngut kiba shah beh kam, 22 ngut ki dei na Shillong Civil Hospital, 11 ngut na Tura Civil Hospital, 3 ngut na Ampati Civil Hospital bad kiwei pat na kiwei-kiwei ki CHC bad Civil Hospital. Kito kiba la shah beh ki kynthup ïa ki ‘Lab Technician’, ICU, OT, ‘Dialysis’ bad ECG ‘Technician’.
