Shillong, Naiwieng 01
Ka Federation of Khasi Jaiñtia & Garo People (FKJGP) ka dap da ka jingsngew lyngngoh halor ka jingkynthoh jong u Myntri ka Sorkar Jylla ba khmih ïa ka tnat PHE uba la pynksan ba ka um kaba sam da ka PHE ka long kaba khuid bad shngaiñ bad uba la buh ruh ka jingartatien halor ka jingshim um nongmuna jong ka seng ba la phah peit bniah.
Ka FKJGP ka la dawa na u Myntri ba lada u ong ba ka um ba sam da ka PHE ka long kaba khuid bad shngaiñ ban dih namar ba shwa ban sam la dep ban phah peit bniah, u dei ban ai ïa ki kopi jong ka kaiphod ba la phah peit bniah bad ban sam lyngba ki lad pathai khubor ym ban shu kren tang ba la lait na shyntur.
Ha ka kyrwoh khubor ba la pyllait da u President ka seng u Bah Dundee C Khongsit u la ong, ka seng kam sngew pher ïa kane ka jingkwah tep eit miaw jong u Myntri ka tnat PHE namar u hap ban ïada rapjot ïa ka jingtreikam thurmur jong ka tnat jong u kaba pynpoi ïa ka umbam umdih kaba don jingma ïa u paidbah ha ki 44 tylli ki tyllong um katkum ka kaiphod (report) ba la ïoh da ka seng lyngba ka State Food Testing Laboratory Pasteur Hills, Shillong.
U Bah Dundee u la ong ba na ka bynta ban ïa shai, ka jingleit shim um nongmuna da ka FKJGP na ki kor um bad top um na kylleng ki kyntoit bapher-bapher jong ka nongbah Shillong ka long hadien ka jingujor na babun balang jong ki paidbah na ki shnong bapher-bapher kaba la poi sha ka seng. Te khnang ban pyntikna ïa kane ka jingartatien jong ki paidbah ka seng ka la shim ïa kane ka bynta ban phah peit bniah ïa ka um katkum ka jingbthah kyrpang (Standard Operating Procedure) ka State Food Testing Laboratory Pasteur Hills, Shillong ym kumba la kynnoh da u Myntri ba imat ka FKJGP ka la leit tong ruma na eiei ne nangno-nangno.
Une u nongïalam ka FKJGP u la ong, kaba sngewsih imat une u Myntri u khlem pat pule ïa kato ka kaiphod (report copy) kaba ka seng ka la leit ban aiti sha u Myntri Rangbah ka jylla bad phah kopi ruh sha u Myntri ka tnat PHE bad Myntri ka Koit ka Khiah ka Sorkar Jylla. Dei na kane ka daw u sa poi kren kulmar kumtei namar jin ba u la pule yn lap bad tip shai katno tylli ki tyllong ne kor um kiba la phah peit bniah bad katno tylli kiba don jingma bad katno tylli kiba shngaiñ.
“Ngi kwah ba u Myntri jong ka tnat PHE u dei ban long khuid (transparent) haba ïadei bad kane ka bynta namar u ong ba ka um ba la sam da ka tnat PHE ka long kaba biang bad shngaiñ ban dih namar ki la dep peit bniah na Mawphlang Treatment Plant, te sngewbha ai ïa ki kopi jong ki kaiphod ba la leh ïa kita ki jingpeit bniah lyngba ki lad pathai khubor ym ban shu kren tang da ka shyntur, namar kane ka dei ka kam ïap kam im jong u paidbah khamtam u duk u suk, namar kum ka seng ngi kwah ban ïada ïa u paidbah shwa ban ïoh ka jingpang na kaba dih ïa kum kine ki jait um ba la sam da ka tnat PHE,” la ong u Bah Dundee.
Sa kawei ka seng ka kwah ban buh kane ka jingkylli ba tharai lyngba ka jingpynskhem bad jingpynshai jong u Myntri ba ka um ba sam da ka tnat PHE ka long kaba la shngaiñ shisha, to ai ba ka um ba ki Myntri Sorkar ne ki heh Sorkar kiba shong ha Secretariat kin dih beit ïa ka um kaba wan na tyllong ne top um ba la sam da ka PHE ym donkam shuh ban ïa buh kito ki ‘filter ne aqua guard’ namar bun na ki longïing bym kot bor ne ba duk kim ïoh lad kumba buh ma ki ha Secretariat, la ong utei u nongïalam ka FKJGP.
Khatduh khatwai ka seng ka don tang kawei ban ong ba kan nym shong kli-kti halor kane ka mat kaba ktah im-im peit-peit ïa ka koit ka khiah jong u paidbah bad kyntu ïa ka Sorkar ba kan leh la ki jong ki kamram.
