Shillong, Naiwieng 02
Ka kynhun lane ‘Collegium’ ki nongbishar ka Supreme Court ki la ai jingmut ban thung ïa u nongbishar na ka Madras High Court, u Justice S Vaidyanathan, ban long kum u Chief Justice bathymmai ka Meghalaya High Court hadien ba u Justice Sanjib Banerjee u la shongthait noh ha ka 1 tarik Naiwieng, 2023.
Hadien ba la don ka jingïalang jong ka ‘Collegium’ ha ka Sngi Palei, ka Supreme Court ka la ai jingmut ban thung ïa u Justice Vaidyanathan kum u Chief Justice bathymmai ka Meghalaya High Court. Ki dkhot ka ‘Collegium’ ki kynthup ïa u Chief Justice ka Ri India, u Justice DY Chandrachud, Justice S K Kaul bad u Justice Sanjiv Khanna.
Lah ban kdew ba hadien ka jingshongthait jong u Justice Sanjib Banerjee, la thung ïa u Justice Hamarsan Sing Thangkhiew ban long kum u Chief Justice ba shipor ka Meghalaya High Court.
Katkum ka khubor na Supreme Court, la ong ba u Justice Vaidyanathan u la shah thung kum u nongbishar ka Madras High Court ha ka 25 tarik Risaw, 2013. Ha shwa ba un shah thung kum u nongbishar, u Justice Vaidyanathan u la rung sha ka Bar ha u snem 1986, bad u la long u muktiar ha Madras High Court bad kiwei pat ki Tribunal.
Ha ka por ba u dang long kum u muktiar, u la ïasaid halor ki mukotduma kiba ïadei bad ka Labour, Service, Crime bad Company. Ha kaba ïadei bad u synñiang jong u kum u nongbishar mynta la 10 snem, ka Supreme Court ka la ïathuh ba u la thoh 1,219 tylli ki rai bad na kine, 692 tylli ki dei ki rai ba la pynmih ha ki san snem ba la leit noh.
Shuh shuh la ong ba u Justice Vaidyanathan u la don ka jingnang ka jingtip kaba ïar ha kaba dei bad ka kam bishar ha kawei na ki High Court ba heh tam ha ka Ri. Ha Madras High Court, u Justice Vaidyanathan u dei u nongbishar ba la rangbah duh.
Hadien ba ka ‘Collegium’ ka la ai jingmut ban thung ïa u Justice Vaidyanathan kum u Chief Justice ka Meghalaya High Court, ka hukum ban thung ïa u kan wan na ka President jong ka Ri India ha kine ki khyndiat sngi.
