Shillong, Naiwieng:
Ka Joint Action Committee (JAC) jong ka Them Diengïei Area ha ka 1 tarik u Naiwieng, 2023 ka la pynpaw ka jingai khublei ïa ka Hans Foundation kaba na Guwahati kaba la shim ïa ka bynta ban wan ai dawai ei hapoh ka shnong Mawlang kaba don ha Ri Bhoi District na ka bynta ki briew jong ka shnong kiba donkam jingïarap ha ka pang ka shitom khamtam ïa ki briew kiba duk bad kiba duna ha ka ïoh ka kot.
Na ka liang ki nongïalam ka JAC jong ka Them Diengïei Area hapoh ka jingïalam jong u Bah Wanbor Nongneng kum Chairman ha ryngkat ka jingsynranlang u Bah Evanson Mawlong kum Secretary bad u Bah Beststar Kurbah kum Rangbah Shnong ka Nongtraw Siej uba long ruh u dkhot jong ka JAC, ki la pynpaw ïa ka jingkmen hadien ba la pynsngap ïa ki jingeh. Kumta na ka liang ka Foundation khlem da pynslem ki la wan shakhmat ban ai dawai ei ïa ki nongshong shnong bad ha kajuh ka por ki la kyrpad ruh ïa ki doktor jong ka Hans Foundation ba kin bteng ban wan ai dawai hapoh ka shnong Mawlang.
Na ka liang ka JAC ka la pynpaw ruh ïa ka jingsngewdiaw halor ka jingbym don doktor hapoh ka Mawlang Sub-Centre na ka bynta ban ai jingsumar ïa ki paidbah kaba la buh ruh ka jingkyrpad ïa ka sorkar jylla bad kumjuh ïa u nongmihkhmat jong ka thaiñ ban shim khia ha kaba ïadei bad ka jingpynbiang ïa ki doktor hapoh katei ka jaka ai jingsumar namar ba hapoh katei ka thaiñ, ki dang don sa 9 tylli ki shnong kiba la kynthup lang hajuh.
Shuh shuh ka JAC ka la kyrpad ruh ïa ki bor kiba halor ba ki dei ban buh noh ïa ki doktor la kumno-kumno manla ka taïew bad ban kyntiew noh na ka Sub-Centre sha ka Primary Health Centre (PHC) khnang ba kan long ka jingïarap kaba khraw ïa ki briew kiba duk bad kiba duna ka ïoh ka kot.
“Ngi na ka liang jong ki nongkitkam jong ka JAC Them Diengïei Area, ngi dap da ka jingsngewnguh kaba khraw ïa ki nongtrei jong ka Hans Foundation kaba kloi shisha ban ïarap ïa ngi kiba duk ba suk, ngi kitbok ruh ïa ki nongtrei ba kin nang lah ban shakri kham bha ha kine ki sngi ba dang wan. Ngim lah khlem da ai khublei ruh ïa ki nos kiba la ai ka jingshakri kaba paka ym tang ïa ki nongpang hynrei na ka bynta ki jingdonkam baroh kiba ïadei bad ka koit ka khiah ki nongshong shnong kiba don ha ka shnong jong ngi bad ka thaiñ baroh kawei”, la ong u Bah Wanbor Nongneng.
