Shillong, Naiwieng 02
Ka Myntri ka koit ka khiah ka Jylla, ka Kong Ampareen Lyngdoh ka la ong ba ka Sorkar ka la kular ban peit bad pynurlong ïa ki katto-katne ki mat jingdawa kiba la buh hakhmat ka Sorkar da ki Accredited Social Health Activist (ASHA) kiba donbynta ban trei ban pynbha ïa ka koit ka khiah ha ki shnong ki thaw.
Ka Myntri ka la pynpaw ïa kane hadien ba ki ASHA hapoh ka shatri jong ka Meghalaya ASHA Workers’ Union (MASHAWU) ki la buh ïa ki jingdawa sha ka Sorkar Jylla kiba kynthup ïa ka jingpynkiew ïa ka bai siew kaba long T.2000 shibnai, ban pyntreikam lane pynrung lang ïa ka skhim ïoh jingsumar ei na ka bynta jong ki hapoh ka MHIS ne kiwei kiwei pat ki skhim.
Ka Kong Ampareen ka la ong ba ka sngew lyngngoh ïa ka jingpynbna ban sangeh treikam ki ASHA ha Jylla wat la ka sorkar ha ka jingïakynduh bad ki, la kular ïa ki katto-katne ki mat jingdawa ban pynurlong.
“Ki ASHA ki la pynpaw ïa kita ki mat jingdawa jong ki bad na ka liang ka sorkar ka la kular ban peit bad ban pynurlong ïa ki katto-katne ki mat jingdawa kum ka jinglut ïa ka bai sumar la dep ban kular ban peit ïa kane bad ban pynurlong ïa ka lyngba ka MHIS. Kawei pat ka mat kaba ki pynpaw ka long ban ym pynkut shuh ïa ka kam jong ki bad ka sorkar ka la sngap ïa kane da kaba kular ban pynmih da ka policy,” ka la ong. Haba ïadei bad ka jingsiew ha kaba ki ASHA ki la ïanujor ïa ka jingsiew bad ki nongtrei Anganwadi, ka Kong Ampareen ka la ong ba ïa ki Anganwadi la siew da ka tnat Social Welfare hynrei ïa ki ASHA ka mang pisa kam don bad ka tnat ka koit ka khiah jong ka jylla, hynrei ka dei ka mang pisa kaba la ai da ka NHM bad ki ïoh ïa ki kynja jingïoh myntoi kiba bun bha.
“Hynrei da ka jinglyngngoh nga ïoh jingtip ba ki nongtrei ASHA ki pynbna da ka jingsangeh treikam,” ka la ong, bad bynrap ba ka la ïathuh ruh ïa kane ka mat kaba hap ban ïakren bad u Myntri Rangbah.
