Shillong, Naiwieng 02
Ka tnat ka koit ka khiah jong ka sorkar jylla ka la pyntikna ba kan pynlong beit da ka jaka pule doktor (Medical College) ha Umsawli kaba hap ha shnong Mawpat, New Shillong ha jaka ba kan wanrah ïa ka jaka sumar ïa ki nongpang Tuber-culosis Hospital.
Katkum ki khubor ba la ïoh lum na ka tnat ka koit ka khiah, la ïathuh ba mynta ka sorkar jylla ka dang pynbit pynbiang ba kan shim ïa ka rai ban pynlong kum ka jaka pule doktor ha katei ka jaka ba la dep shna nadong-shadong kaba khlem pat treikam pat mynta.
Ïa kane ka jingtei ha Umsawli ka sorkar ka la thmu ban pynlong kum ka jaka sumar ïa kiba pang TB. Pynban hadien ba la dep tei mynta bad ïaid la hynriew snem ka la don ka jingïatan tyllai namar shiphang ki kwah ban pynlong Medical College bad shiphang kin pynlong ka jaka sumar ïa ki nongpang TB.
Kumta namar bym lah ban shim rai, ka sorkar jylla ka la pynlong ïa katei ka jaka kum ka jaka sumar Covid-19 haduh mynta.
Ha ka jingjurip u nongthoh khubor ha kine ki sngi la lap ba don ki kamra kiba la pyut ki jingkhang kiba shna da ki dieng, ka phyllaw la dap da ki ñiut bad ka surok ruh ka la dap da ki phlang.
Hadien ba la mih ka khubor halor bym pat treikam ka jingtei ha Umsawli, la ïoh jingtip ba ka sorkar jylla lyngba ka tnat Pynroi Sor ka lah ban shimti noh halade khnang ban ïoh pyndonkam da kiwei pat ki shlem treikam kaba ka sorkar ka dang donkam.
Haba buddien biang na ka tnat ka koit ka khiah kan nym shongthait, hynrei kan pyntikna ban pynlong beit da ka jaka pule doktor bad ïa mynta kim kwah ban batai lut namar ka kam ka dang ïaid shakhmat.
Kumta ka jingthmu naduh ba nyngkong ka long ban wanrah noh ïa ki nongpang TB na Mawbah, Upper Mawprem sha Umsawli hadien ba la dep shna, hynrei namarba ïatyngkhuh bun ki jingtyrwa katei ka hospital ka dang sahkut beit ha Mawbah.
Kane ka hospital ha Umsawli ka dang hap ha ka jingpeit ka shnong Mawpat kaba ïaid na pyrshah ka ïingdorbar ba dang shna mynta na Mawdiangdiang ban kiew na ka lad NIFT bad IIM.
