New Delhi, Naiwieng 02 (UNI)
Na ka daw jong ka jingjur ka jingjaboh ka lyer, ka sorkar Delhi ha ka Sngi Palei ka la pynbna ban khang khyrdep ïa ki skul sorkar bad skul shimet na ka bynta ar sngi.
U Myntri Rangbah ka Delhi, u Arvind Kejriwal, u la pyntip halor kane bad u la ong ba na ka daw jong ka jingkiew ka jingjaboh ha ka lyer, baroh ki skul ha Delhi kin khang ha ka Sngi Thohdieng bad Sngi Saitjaiñ. Ha ka Sngi Palei, ka jinglong jong ka lyer ha Delhi ka la nang hiar, bad ki khynnah skul ki long kiwei na kiba shah ktah jur na ka jingjaboh ka lyer.
