Shillong, Naiwieng 02
Haba pynpaw ka jingsngewkmen ïa ka jingplie lyngba ka bor internet ïa ka lynti rel Akhaura-Agartala da u Myntri Rangbahduh u Narendra Modi bad ka Myntri Rangbahduh jong ka Bangladesh, ka Sheikh Hasina ha ka 1 tarik Naiwieng, 2023, u Secretary ka North Eastern Council (NEC), u K Moses Chalai, u la ong ba na kane ka projek lynti rel kaba 12 km, 5.45 km kaba hap ha ka bynta jong ka India ka dei kaba la bei tyngka da ka Tnat DoNER bad ka NEC kaba long T. 863 klur.
Ka jingmang tyngka baroh na ka bynta ka projek kaba 12 km ka long T. 973 klur ha u bnai Naitung, 2016, bad ka NEC ka la dep ban pyllait T. 798.73 klur.
Ïa kane, u Chalai u la kren sha ka kynhun ki lad pathai khubor ba kynthup 13 ngut ki nongpathai khubor na Maharashtra hynnin ka sngi ha NEC.
Kane ka kynhun ka la wan ïashim bynta ha ka jingleit peit bniah ba la pynlong da ka Press Information Bureau hapoh ka skhim ba la bei tyngka da ka sorkar pdeng kaba la tip kum ka Development Communication and Information Dissemination. Ka jingthmu jong kane ka long ban pyni ïa ki kam pynroi bapher bapher ba la sdang ha jylla Meghalaya, ka bynta jong ki kynhun bapher bapher jong ka Sorkar India ban ai jingkyrshan na ka bynta ka jingshngaiñ bad ka roi ka par bad pyni ïa ka jingriewspah ka dei-riti jong ka jylla.
Haba ïakren bad ki nongthoh khubor, u Secretary u la ong ba ka North Eastern Council kaba long ka shlem treikam na ka bynta ka jingkyntiew ïa ka ïoh ka kot bad ka imlang sahlang jong ka thaiñ Shatei Lam Mihngi, ka la long kaba kongsan ha ki kam jong ka.
Ki jingjop jong ka ha ki 50 snem ba la leit hadien ba la sdang ïa ka ha u snem 1972, ki la long kiba khraw ha ka liang ka jingkyntiew ïa ki jingdon jingem, ka pule puthi, ka koit ka khiah bad ki kam rep. Namarba ka long ka kynhun kaba pynkhreh kam na ka bynta ka thaiñ Shatei Lam Mihngi, ka NEC ka la plie ïa ka North East Resource Centre (NERCEN) da ki jingthmu ban kyntiew ïa ka jingpyndonkam ïa ka Remote Sensing & Satellite Imagery, ka rynsan ai jingtip ïa ki nongjngoh kai kaba don nongrim ha ka GIS bad ka jingpeit ïa ka jingduna ha ka jingïasoh lyngba ki surok, ka jingkyntiew ïa ka jingwad bniah bad ki jingsaiñdur thymmai ha ki kam kiba ïadei bad ka jingkylla ka suiñbneng, ki teknoloji ba saiñdur thymmai, ka jingbuh jingtip shaphang ki rukom im tynrai, ki rukom thoh dak bad ki ktien kiba don ha ka jingma ban duh jait bad ki jaka ba sahdien bad ka data centre bad ruh kawei ka jaka pdeng ban ïoh jingtip shaphang ki lad kamai jakpoh.
U Chalai u la ong ba ka NEC ka dei kaba don bynta ha ka jingsdang bun ki projek kiba heh kum ka Regional Institute of Medical Sciences, Imphal, North East Police Academy, Shillong, North Eastern Electrical Power Corporation Ltd. Shillong, North Eastern Region Agriculture Marketing Corporation Guwahati, North Eastern Regional Institute of Science & Technology, Itanagar, Regional Institute of Paramedical & Nursing Sciences, Aizawl, North Eastern Regional Institute of Water and Land Management ha Tezpur, Lokpriya Gopinath Bordoloi Regional Institute of Mental Health Tezpur, North Eastern Space Application Centre, Shillong, Bhubaneswar Borooah Cancer Institute, Regional Dental College, Guwahati, Regional Nursing College, Guwahati, Regional Institute of Pharmaceutical Science & Technology, Agartala bad ka Cane and Bamboo Technology Centre ha Guwahati.
U la ai jingtip ïa ka kynhun ba la shna 11,432.00 km ki surok da ka jingbei tyngka ka NEC ha ka thaiñ Shatei Lam Mihngi. Ka la ai jingïarap ban buh ïa ki jaka pynmih bording ba 694.5 MW bad ka jingshna 10,341.63 circuit km ki sainar pynpoi bording, ka jingshna 11 tylli ki Inter-State Bus Terminus (ISBT) bad ka jingkyntiew ïa ki jingdon jingem ha 5 tylli ki kad liengsuiñ jong ka thaiñ. Ka la ai jingkyrshan ïa ka North Eastern Regïon Community Resource Management Project (NERCORMP) ka projek na ka bynta ki kam kamai jakpoh ba lah ban ïaineh ryngkat ka jingkyrshan na ka IFAD.
Ka Deputy Director, PIB Mumbai ka Jayadevi bad Deputy Director, DDK Shillong u Sarnag Pofale, M&CO PIB u Gopajit Das bad ki ophisar jong ka NEC ki la ïadonlang ha kane ka jingïalang.
