Shillong, Naiwieng
Ka jingjot rathai bad pei thliew ki rurok ha kylleng ka sor Shillong ka la pynjynjar ïa ki nongñiah kali ban kiar haba bun ki kali lada ïaid ha surok ka buh jingeh ruh ïa ki pulit pynïaid kali lada ki kali ki ñiah suki namar ka jingsniew ka surok.
Kumta ki pulit pynïaid kali ka thanat Lumdiengjri kiba dang don ha ka kam ryngkat ka uniform ki don ka jingkitkhlieh bad ieh shipor ïa ka kam ban pynïaid kali bad ki la hap ban shim u mohkhiew bad ka belsha ban pyndap kyndew ïa ki surok ba pei thliew ha ki thaiñ Lumdiengjri haduh Garikhana.
Ka jingsniew surok ha kane ka bynta ka wan rah ka jingdheng kali kaba jur hapoh nongbah Shillong namar ki kali ki hap ban ïaid biang biang ban kiar ïa ki thliew.
Kane ka jingshim ki pulit pynïaid kali ka Lumdiengjri ïa kane ka lyngkor ka long khnang ban pyllait ïa ka dheng kali.
Kane ka jingmaramot ïa ka surok ha ki jaka ba thliew la pyndap da ka khyndew namar ka jingsniew ka surok ka la kham slem kaba wat ki pulit pynïaid kali ki isynei ïa ki nongñiah haba ki kali ki tyngkhuh ha surok namar ka jingsniew palat.
