Shillong, Naiwieng 02
Ki nonghikai skul kiba hapoh ka synjuk jong ka All Meghalaya Primary School Teacher Association (AMPSTA) ki la ïakynduh ïa u Symbud Myntri Rangbah u Bah Prestone Tynsong ban pynkynmaw ïa ki jingkular kiba u la ai, kata, ban pyllait noh ïa ka ‘arrear revised pay’ kaba dang sahkut jong ki nonghikai skul Deficit.
Ki nongkitkam ka AMPSTA hapoh ka jingïalam u Babu F.C Shullai kum u General Secretary, ki la ïakynduh ïa u Bah Prestone Tynsong ha ka kamra treikam jong u ha Secretariat ha ka 31 tarik Risaw. Ha ka jingïakren, ka AMPSTA ka la pynkynmaw ïa ki jingkular kiba u Symbud Myntri Rangbah u la ai ban pyllait noh ïa ka ‘arrear revised pay’ kaba dang sah jong ki nonghikai skul Deficit, bad na ka liang u Symbud Myntri Rangbah ruh u la pynpaw ba ka jingkular jong u kan sa urlong kumba la dep kular mynshwa ba ka Sorkar kan pyllait ïa ka hashwa ka Khristmas.
Ha ka jingïakynduh, ka AMPSTA ka la pynpaw ruh ïa ki jingeh ba ki nonghikai ki ïakynduh namar ka jingbym ïoh tista ïa ka tulop man u bnai, bad ïakren ruh ïa ki kam mukotduma jong ki nonghikai.
Ka AMPSTA lyngba u General Secretary bad ki dkhot kiba ïadonlang, ka la pynpaw ka jingsngewnguh ïa ka jinglong ba la kloi u Symbud Myntri Rangbah uba la shah shkor ïa ki jingdawa jong ka seng.
Haba ïadei bad kiwei kiwei ki mat jingdawa, u Symbud Myntri Rangbah u la kular ruh ba un sa nang ïai buddien biang pat.
