Shillong, Naiwieng 02
Ka Synjuk Rangbah Shnong Ri Bhoi hapoh ka jingïalam u Bah BB Makdoh ki la leit ïakynduh ïa u Myntri ka tnat Pynroi Nongkyndong u AT Mondal ban kyrpad pyllait noh ïa ka pisa bai tiar kaba la sahkut mynta la lai snem jong ka skhim MGNREGS.
U la ong ba ka jingsahkut ka bai tiar la palat lai snem ka la pynsahteng ïa ki skhim MGNREGS ha ki shnong ki thaw namar ki nongkyrshan bai tiar kim treh shuh ban ai tiar naba ka pisa barim kim shym la ïoh.
Nalor nangta u la ong ba ha kine ki lai snem ka sorkar ka pyllait ïa ka bai tiar kumba 30 percent na ka 100 percent. Kane ka la buh jingeh ïa ki shnong ba kin pynïaid sted ïa kane ka skhim.
U Bah Makdoh u la pyntip ba wat ka bai bylla sngi ki ‘job card’ ruh ka sorkar kam shym la pat pyllait mynta la lai bnai bad kane lei ka la buh jingeh ïa ki nongbylla sngi.
Nalor kata, u la pynpaw ba u Mondal u la lyngngoh haba u ïoh jingtip ba ka Ri Bhoi ka ïoh duna bha ka bai tiar haba phah pisa na ka sorkar jylla.
Kumta u la kyntu ïa u Mondal ba dei ban ailad ïa ki trai kiba don par maw par shyiap ba kin plie namar haduh mynta ka sorkar ka ai laisen tang ha Killing, Umsning bad Umroi. Kane ka buh jingeh ïa ki paidbah ban leit thied tang shi trok ar trok haduh Killing haba ki donkam ban shna ïing. U la ong ba lada ailad ïa ki trai jaka ban die ïa ki shyiap ki maw ka long kumba ai kam ïa ki samla khlem kam khlem jam. Ha kajuh ka por u la pyntip ba u la leit ïakynduh ïa u Bah Paul Lyngdoh, Myntri ka tnat Social Welfare ban kyrpad pynkha Anganwadi Centre sa ha kito ki shnong kiba la don palat 200 ngut ki khynnah namar haduh mynta ki don palat 30 tylli ki shnong. Na ka liang u Bah Paul Lyngdoh u la kular ban phah wad jingkheiñ ïa ki shnong kiba la donkam ban shna ïa ki ïing ban sam shana ïa ki khynnah.
