Gaza, Naiwieng 02 (UNI)
Ka jingïap jong ki briew ha Gaza Strip na ka jingther bom jong ka Israel ka la kiew sha ka 8,805 ngut ha ka Sngi Palei katba 22,240 ngut ki la don hapdeng ka jingmynsaw, la pynbna ka tnat ba dei peit ïa ka koit ka khiah ha Gaza.
Napdeng kine kiba la shah pynïap, katei ka tnat ka la ïathuh ba 3,600 ngut ki dei ki khyllung khynnah.
Lah ban kdew ba ha ka Sngi Ba-Ar, ki shipai Israel ki la pynbna ba ki la ther ïa ka ktem Jabalia kaba don ha Gaza Strip. Ka la ong ba ka jingïap jong ki ‘riew paidbah ha kane ka jingther ka dei shi bynta na ka thma.
Ka tnat pohïing jong ka Gaza ka la ïathuh ba kumba 400 ngut ki briew ki la shah pynïap lane pynmynsaw hadien ba ki shipai Israel ki la ther da ki bom ïa katei ka ktem ba sah ki poiwir.
Ha ka Sngi Balang, ki shipai Israel ki la ther biang ïa katei ka ktem ha Jabalia bad da ki phew ngut ki briew ki la shah pynïap.
Lah ban kdew ba ka thma hapdeng ka Hamas na Gaza Strip bad ka Israel ka la sdang ha ka 7 tarik Risaw hadien ba ki lehnoh Hamas ki la leit ban thombor bad pynïap ïa ki ‘riew paidbah bad shipai ka Israel na ki bynta ba Shathie.
Na ka liang ka Israel ka la ther kylla bad ka la shim ruh ïa ki sienjam ban khang ïa ka jingpynpoi bording, umbam bad umphniang sha Gaza Strip kaba dei ka jaka ba la shong la sah da palat 2 million ngut ki briew.
Ha ka 27 tarik Risaw, ki shipai Israel ki la leit rung ha Gaza Strip ban pynïap ïa ki dkhot jong ka Hamas bad ban pyrshang ban pyllait im ruh ïa ki briew kiba ka Hamas ka la rahbor ha ka 7 tarik Risaw.
Naduh ba sdang jong ka thma bad haduh mynta, ki la don kumba 1,400 ngut ki nong Israel bad 8,805 ngut ki nong Gaza Strip kiba la shah pynïap katba da ki hajar ngut kiwei pat ki la mynsaw.
