Tura, Naiwieng 02
San ngut ki briew ki la shah kem na kawei ka shnong ha West Garo Hills halor ka jingkynnoh ba ki la donkti ban rahbor bad leh be-ijot ïa kawei ka khynnah kaba dang 14 snem ka rta.
Katkum ka khubor ba la ïohlum ha ka Sngi Palei, la ong ba ha ka jingujor (FIR), u kpa jong katei ka khynnah u la pyntip ba na kitei ki san ngut, tang uwei na ki u la donkti ban leh be-ijot ïa katei ka khynnah katba saw ngut kiwei pat ki la ïarap ïa uta u runar ban rah jubor ïa ka.
La ong ba kane ka jingjia ka la jia ha ka janmiet jong ka 1 tarik Naiwieng, 2023.
Ha ka FIR ba la ai mynta ka sngi ha thanat Phulbari, West Garo Hills, u kpa jong katei ka khynnah u la ai ïa ki kyrteng jong ki san ngut ki briew kiba la donkti ha katei ka kam runar bad kine baroh ki la shah kem mynta ka sngi hi ha ki pulit.
Kitei san ngut kiba la shah kem ki dei ba la tip kyrteng kum u Zakirul Islam, Rakif Hussain, Bhima Sanyasi, Laddu Islam bad u Kaushik Gupta.
Katkum ka FIR, la ong ba ha 1 tarik Naiwieng ha ka por kumba 10 baje mynmiet, katba katei ka khynnah ryngkat bad ki paralok jong ka, ki dang don ha lynti ban wanphai sha ïing, ki la shah pakhang lynti ha kitei san ngut.
La ong ba u Zakirul u la wan da ka thuk-thuk bad u la rah jubor ïa katei ka khynnah sha kawei ka jaka kaba kynjah katba kiwei pat ki la shoh la dat ïa ki paralok jong ka. Nalorkata, la ong ba une u runar u la rah ïa katei ka khynnah sha kawei ka pynthor bad hangta u la leh be-ijot ïa ka.
Hadien ba u la leh ïa kane ka kam runar, u la byrngem ruh ïa ka ba un pynïap lada ka ïathuh hano-hano lane lada ka pyrshang ban pyrta ban ïoh jingïarap.
Nalor nangta, ha ka FIR la pyntip ruh ba katei ka khynnah, hadien ba ka la shah leh be-ijot, ka la ïoh ban phet krad da kaba kynthih na ka thuk-thuk. Hadien kata, ka la leit sha ka ïing jong kawei na ki paralok jong ka, bad dei mynta ka sngi ba ka la ïathuh shaphang katei ka jingjia ha ki bahaïing hasem.
Ka tyllong khubor ka ïathuh ba kitei runar ki la rah da ki tiar ki tar pynmynsaw bad ki la pyndonkam ban byrngem byrsit ïa katei ka khynnah.
Hadien ba la ïoh pdiang ïa katei ka FIR, ki pulit ka thanat Phulbari ki la leit ban kem ïa kitei san ngut, bad la rah ruh ïa ki sha ïingbishar.
“Ngi dang tohkit halor katei ka jingjia, bad baroh kiba la shah kynnoh ki la shah kem. Uwei u pulit uba bat ïa ka kyrdan ASP un sa leit sha katei ka jaka ban pynlong ïa ka jingtohkit. Ngin sa shim ïa ki sienjam kiba tyngeh pyrshah ïa kiba donkti,” la ong u SP ka West Garo Hills, u Abraham T Sangma.
Na ka liang shi kynhun ki seng kiba na ka thaiñ Phulbari ki la pynrem jur ïa katei ka jingjia bad ki la dawa ba dei ban pynshitom da kaba tyngeh ïa kiba donkti.
