Shillong, Naiwieng 02
Ka NPP Pynursla Block kaba hap ha East Khasi Hills District kaba dei ruh ka konstitwensi kaba la mihkhmat da u Symbud Myntri Rangbah ka Jylla u Bah Prestone Tynsong uba la shah jied mynta kum u President ka NPP Meghalaya Unit ka la dep jied ïa ar ngut ki kyrtong na ar tylli ki konstitwensi na ka bynta ban ïakhun ïa ka ilekshon MDC sha ka Khasi Hills Autonomous District Council (KHADC).
Katkum ka khubor ba la ai jingtip na ki nongkitkam ka NPP jong kitei konstitwensi kiba ka NPP Pynursla Block ka la ïoh ban pynbna ïa ki kyrteng jong kyrtong ki long na Lyngkyrdem-Laitkroh konstitwensi u Bah Rahborlang Tynsong bad na Nongshken konstitwensi ka Kong Grace Mary Kharpuri kaba dei ka MDC kaba la jop bunsien.
Kine ar ngut kyrtong ba la mynjur da ki nongkitkam jong kitei konstitwensi kiba hap ha MDC bad la ïoh ïa ka jingmynjur na ki nongkitkam ka NPP Pynursla Block.
Ki khubor na ki nongkitkam ka NPP ka ïathuh ba ka Pynursla Block kan sa phah ïa kine ki kyrteng sha ka East Khasi Hills District bad ka District kan sa phah sha ka NPP Meghalaya Unit.
Ki la ïathuh ba ka jingphah ïa kine ar ngut ki kyrtong ka dei hadien ba ki nongkitkam ki la shim ïa ka rai ban jied tang iwei kyrtong ban phah sha ka District.
Wat la u Bah Prestone Tynsong u dang pynkhreh ban pynkhlaiñ ïa ki committee, hynrei ka NPP Pynursla Block ka la dep ïaid shakhmat ban wad lypa ïa ki kyrtong na ka bynta ban suk haba leit sha ki paidbah na ka bynta ka ilekshon MDC.
