Shillong, Naiwieng 02
Ka phlim Rai-eh kan dei ka phlim Khasi kaba nyngkong hapoh ka jylla ba kan ïoh pyni ha Khasi National Dorbar Hall Mawkhar na ka bynta shi taïew ka ban sdang naduh ka 27 tarik mynta u bnai Naiwieng haduh ka 2 tarik Nohprah, 2023.
Kane ka jingleit pyni ïa ka phlim Rai-eh ha Khasi National Dorbar Hall Mawkhar namar la sngewthuh ba kane ka phlim ka dang slem ban ïoh pyni ha Bijou Cinema Shillong namar ki dang bun ki phlim Khasi kiba dang ap pali.
Ha kane phlim la ak da u Bah Amazing Kurbah kum u tyngshop, ka Meda Basaïawmoit kum ka puron, u Kynsai Lynshiang, Ibadamut Kurbah bad la direct da u Bah Kit Rina Nongrum.
Ka por ban pyni ïa kane ka phlim ka long 11:30 mynstep, 2:00 baje noh phai sngi, 5:00 baje janmiet bad 7:00 baje mynmiet.
Kane ka jingpyrshang ba nyngkong ban pyni ïa kane ka phlim ha Mawkhar ka long hadien ba ki phlim Khasi kim da ïoh por lypa shi bnai ban ai jingpynbna namar u trai ka Bijou Cinema u pyni ïa ki phlim Khasi tang lada duna ki phlim Hindi.
Lada ki paidbah kin ai jingkyrshan ïa ka phlim Rai-eh ha Mawkhar kan dei ka jingkyrkhu ïa ki nongpynmih phlim Khasi namar kin sa ïoh lad kiwei de ki phlim Khasi ban sdang pyni kiba dang ap pali ha Bijou Cinema.
Ka phlim Rai-eh kaba ki paidbah kin kham ïohi ka dei namar ka jingshimbynta u Bah Amazing Kurbah kum u tyngshop uba dei u khlur ïalap ilekshon MLA ha Sohïong konstitwensi.
Ka jingeh ba ki phlim Khasi ki ïakynduh mynta ka dei namar kim shym la don la ka jong ka hall ban pyni phlim Khasi naba ka dang shaniah ha ka Bijou Cinema Shillong ryngkat ka jingshah ot ka GST bad ka jingshim bhah kham bun na ka jingmih jong ki phlim.
