Shillong, Naiwieng 03
Ka Core Committee jong ka United Democratic Party (UDP) kan sa shong jingïalang ha ka 7 tarik mynta u bnai ha shlem treikam ka UDP ha Shillong ban ïaphylliew jingmut halor ka jingwad ïa u kyrtong ba ka UDP kan sei sha ka ilekshon MP Lok Sabha ban long ha u snem 2024.
Haba ïakren bad u Bah Alantry Dkhar uba dei u Vice-President ka UDP Sengkmie, u la ïathuh ba ha kane ka Core Committee kin kynthup ïa ki MLA bad ki MDC kynthup ïa ki nongkitkam kiba hakhmat.
U la ïathuh ba kane ka Core Committee kan shong pyrkhat ïa ki hynriew ngut ki kyrteng kiba la paw ha kine ki sngi.
U la ïathuh ynda ka Core Committee ka la phylliew jingmut kan sa bthah ban khot ïa ka Central Executive Committee (CEC) ban khot jingïalang ban tyrwa ïa ka kyrteng jong u kyrtong uba biang ban ïakhun ïa ka ilekshon MP.
Kumjuh ruh u la pyntip ba ka CEC kan sa ai bor ha ka State Election Committee ba kan sa shim ïa ka rai ban pynbna ïa u kyrtong MP Lok Sabha.
“Haduh mynta ngim pat lah ban batai mano uba biang na kine ki hynriew ngut hynrei ngin sa ïa thew ïa woh ha baroh ki committee khnang ba ngin ïoh ban jied ïa u kyrtong uba ïamon lang baroh” u la ong.
Kine ki kyrtong kiba la paw kyrteng ha kine ki sngi ki long u Bah PT Sawkmie uba dei u MLA barim ka Mawlai, Bah Paul Lyngdoh MLA ka West Shillong uba dei u Myntri ha ka Sorkar Jylla, Bah Titos Chyne MDC ka Sohra, Bah Jemino Mawthoh kum General Secretary ka UDP, u Dr.DRL Nonglait uba dei u President ka Khasi Authors Society bad u Robertjune Kharjahrin uba dei u President ban sa shongthait noh na ka seng HYC.
Kum ban shu pynkynmaw kiwei ki seng saiñpyrthei kiba la dep pynbna kyrtong ki long ka Congress ïa u MP ba mynta Bah Vincent Pala, ka VPP ïa u Dr. Ricky Syngkon, nangta ka NPP hadien ba u Bah Prestone Tynsong u la shimti kum u President ka NPP Meghalaya u la pyntip ban pynbna noh ïa u kyrtong mynta u bnai Naiwieng bad ka UDP kan sa pynbna ynda la dep shong ïa pyrtkhat.
