Shillong, Naiwieng 03
Ka Hynñiewtrep National Youth Front (HNYF) East Khasi Hills ka la pynpaw ïa ka jingsngewkhia ha kaba ïadei bad ka jingkhot ka sorkar ïa ka ‘tender’ na ka bynta ban ïoh pynïaid ïa ki kali kit nongpang ne ‘Emergency Service’ ha ka jylla hadien ba ka sorkar ka la pynkut noh ïa ka kontrak bad ka kompani GVK.
Haba kren sha ki lad pathai khubor ha ka 3 tarik u Naiwieng 2023, u Assistant General Secretary ka HNYF East Khasi Hills, u Bah Tyllibor Swer u la ïathuh ba napdeng ki 7 tylli ki kompani ba wan thep ‘tender’ ki don lai tylli kiba pass ïa ka ‘Technical bid’ bad kaba sah ka dei sa ha ka ‘Financial bid’.
U la ong ba napdeng kitei ki lai tylli ki kompani ba pass ki kynthup ïa ka Medulance, ka Ziqitsa bad ka Global Health Service (GHS). U la ïathuh ruh ba napdeng kine lai tylli, ka Medulance ka la ju don ki dak saw ha ka jingpynïaid ïa kum kane ka kam namar kam lah ban siew tulop ïa ki nongtrei haduh 6 bnai sha ki nongïakhun kiba hakhmat tam ha ka por ka khlam Covid-19, katba ka Ziqitsa ruh ka don dak saw bad kane lei ka dang don hapdeng ka jingtohkit CBI halor ki kam ba ïadei bad ka pisa tyngka.
U la ong ruh ba katkum ka jingbuddien ka seng hadien ba ka sorkar ka la pynkut ïa ka jingaiti ban pynïaid da ka GVK EMRI, ka seng ka lap ba ka sorkar lyngba ka National Health Mission (NHM) ka la pynïaid hi ïa kane ka jingai jingshakri. Dei na kata ka daw ka seng ka sngewdei ba namar ha kine ki por ba ka sorkar ka pynïaid hi kam ju mih kano-kano ka kynrum-kynram bad kumta ka seng ka kwah ba ka NHM ka dei ban dang bteng ban pynïaid biang ïa ka kam.
“Lada ka sorkar ka lah ban pynïaid hi dalade ïa kane ka kam, kan long kaba kmen palat namar kan kham suk bad kham sting lada ka bat hi ka sorkar ha kaba ïadei bad kine ki kam”, la ong u Bah Swer.
Shuh shuh u la ong ba ka seng ka la ïoh jingtip ba ka sorkar lehse kan pynlong ïa ka ‘Financial Bid’ ha ka Sngi Saitjaiñ ka 4 tarik u Naiwieng 2023 bad ka seng ka kwah ban ai ka kyrwoh kaba shai ba kam dei ban ai pynïaid sha kiba pan duna dor tam hynrei ban da pynshong nongrim ba lada ka ai ruh ka dei ban ai sha ki kompani ban nym mih kano-kano ka kynrum-kynram kum ha ki snem kiba la dep.
