Shillong, Naiwieng 03
Ka Shillong Traffic Police (STP) ka la wanrah ïa ki katto katne ki jingpynkylla ha ka rukom ïaid jong ki kali ha ki surok ka ban treikam pura naduh ka 6 tarik u Naiwieng, 2023.
Kitei jingpynkylla ki kynthup ha ki thaiñ Madanrting bad Polo ha kaba ha ki bynta jong ka Polo, yn ym shah ban rung na 4th Furlong ïa ki kali kiba thmu ban leit sha Polo, hynrei ki hap ban phai noh na ki bynta jong ka CS, Pinewood, B.K Bajoria.
Yn ym shah shuh ban phai sha ka liang kamon ha Matri Mandir ïa ki kali kiba thmu ban leit sha ïew Polo hynrei ki hap ban leit beit sha 4th Furlong.
Yn ym shah shuh ban phai ha ki bynta jong ka Green Hills ïa ki kali kiba wan na ki thaiñ jong ka surok Polo Towers bad kiba thmu ban leit sha 4th Furlong, hynrei ki hap ban leit sha ka liang kamon kata sha Ïew Polo bad nangta sa leit sha 4th Furlong.
Katba ha ki thaiñ Madanrting, ka surok na Lumbasuk shaduh sha National Law University (NLU) kan dei noh ka ‘One Way’ ne kawei ka lynti, ha kaba ki kali kin hap ban ïaid tang na ka surok Lumbasuk sha NLU.
Ka surok naduh na surok Demthring Petrol pump shaduh sha Madanrting Presbyterian kan dei ka ‘One Way’ ha kaba ki kali ki lah ban ïaid tang na Demthring Petrol Pump bad leit sha ka surok Madanrting Presbyterian.
Ka surok na ka Ïew Madanrting shaduh Demthring Petrol Pump kan dei ka ‘One Way, ha kaba ki kali ki lah ban ïaid tang na Ïew Madanrting bad leit sha Demthring Petrol Pump.
