Shillong, Naiwieng 03
Ki lai tylli ki Autonomous District Council (ADC) ka Jylla ki la ïakynduh lang bad ka Sorkar Jylla ha ka Sngi Thohdieng ban ïakren shaphang ka jingpyntreikam ïa ka Digital India Land Record Modernisation Programme (DILRMP) kaba wan na ka Sorkar Pdeng ha kaba la bynshet ban pyntreikam da ki District Council.
“Ngi la don ka jingïakren kaba bniah hapdeng ka tnat District Council Affairs ka Jylla bad ki lai tylli ki ADC ha kaba la bynshet ha ki ADC ban pyntreikam,” la ong u Symbud Myntri Rangbah uba peit ïa ka tnat DCA, u Bah Prestone Tynsong ha ka Sngi Thohdieng.
U la ong ba ha kane ka jingïakynduh la ïakren kumno ban don ki Project Monitoring Unit ban pyntreikam ïa kane ka rukom pynrung ïa ki jaka puta katkum ki kor ki bor namarba kiba bun ki trai jaka kim don ka jingbuh ryntih. U Bah Prestone u la ong ba ki don shibun ki jingïakajia jaka ha kaba ki mih bun ngut kiba kam trai hynrei lada don kum kane ka jingbuh ryntih kan ïarap shibun eh ban ithuh ïa ki trai jaka, bad yn nym don mano-mano ba lah ban shu kam trai.
Kumta u la ong ba lyngba kane, ki trai jaka ruh kin suk bad kin biang ka jingbuh ryntih ïa ki jaka puta jong ki bad lait na ka kynrum-kynram ha kaba ki jaka kiba la pynrung bad ka Council ki ïoh jingithuh katkum ka aiñ.
