Shillong, Naiwieng 03
Ka Enforcement Directorate ha ka Sngi Thoh-dieng ka la kynnoh ba u Myntri Rangbah ka jylla Chhattisgarh, u Bhupesh Baghel, u la dep ïoh haduh T. 508 klur na ki nongpynïaid ïa kawei ka Mobile App kaba dei bad ki kam khalai ïa kaba la tip kum ka Mahadev Book Online.
Kane ka jingkynnoh ka long hadien ba hynnin ka sngi, ka Enforcement Directorate ka la leit ban khynra ha Chhattisgarh bad ka la ïoh ban kurup haduh T. 5.39 klur. Lah ban kdew ba hadien katto katne taïew, ki paidbah ka Chhattisgarh kin sa jied ïa ki MLA bathymmai ha ka ilekshon.
Ka jingleit khynra ka long shi bynta na ka jingtohkit ka Enforcement Directorate ha kaba ïadei bad ka Mahadev Online Betting App ha kaba ki nongpynïaid ïa kane ka App ki shong ki sah shabar ri bad ki pynïaid ïa ki hajar tylli ki Panel ha baroh kawei ka Ri India da ka jingïarap jong ki paralok bad kiba ïatreilang. Kiba kham bun na kine ki nongïarap bad ki paralok kiba pynïaid ïa ka App ki dei na Chhattisgarh bad ki nongpynïaid ki la dep ban kamai da ki hajar klur tyngka.
Haduh mynta, ka Enforcement Directorate ka la dep ban kem ïa saw ngut ki briew kiba ïadon bynta bad ka jingpynïaid ïa kane ka App khalai bad la ïoh ruh ban kurup palat T. 450 klur kaba dei ka jingkamai kaba mih na ka jingpynïaid ïa katei ka App. Nalorkata, ka Enforcement Directorate ka la dep ban ai jingmudui pyrshah ïa 14 ngut ki briew.
Hynnin ka sngi hadien ba la ïoh jingtip ba kan don ka pisa ka ban pynïaid sha Chhattisgarh da ki briew kiba ïadon bynta bad katei ka Mahadev App na ka bynta ban ïoh pyndonkam ha ka ilekshon ha Chhattisgarh ka ban long ha ka 7 bad 17 tarik Naiwieng, 2023, ka Enforcement Directorate ka la leit khynra ha Hotel Triton bad sa kawei pat ha Bhilai bad ka la ïoh ban kem ïa uwei u nongrah pisa ïa uba la tip kyrteng kum u Asim Das. La ong ba ïa une u Asim Das la phah na UAE ban wanrah ïa ka pisa ban ïoh pyndonkam na ka bynta ka ilekshon da ka seng Congress.
Na ka liang ka Enforcement Directorate ka la ïoh ban kurup T. 5.39 klur na ka kali bad ka ïing jong u Asim Das. Ka Enforcement Directorate ka la kam ba u Das u la phla ba ïa kane ka pisa la pynbiang da ki nongpynïaid jong ka Mahadev App ban ai sha uwei u ‘riew saiñpyrthei ïa uba la tip kum u Baghel na ka bynta ban pynlut ha ka ilekshon ha Chhattisgarh.
Shuh shuh ka Enforcement Directorate ka la lap ïa ki katto katne ki Bank Account ka Mahadev App ha kaba ka jingdon ka pisa ka long T. 15.59 klur, bad ïa kane la kurup noh bad la kem ruh ïa u Asim Das.
Ka Enforcement Directorate ka la ong ba na ka jingtohkit ïa u Asim Das bad na ka jingpeit bniah ïa ka Phone jong u, ka la don kawei ka email ba la phah sha u Shubam Soni uba dei uwei na ki heh ba pynïaid ïa ka Mahadev App. Na kane ka email, la shem ba ki don ki jingthoh kiba pyni ïa ka jingsiew pisa kaba na ka por sha ka por kaba la kot sha ka T. 508 klur ba la siew da ki nongpynïaid ka Mahadev App sha u Myntri Rangbah ka Chhattisgarh u Bhupesh Baghel. Hynrei ïa kine, ka Enforcement Directorate ka la ong ba kan hap ban tohkit bniah.
Ha kajuh ka por, ka Enforcement Directorate ka la tohkit bad kem ïa uwei u pulit langrut ba la tip kum u Bheem Yadav. La ong ba ha ki lai snem ba la leit noh, u Bheem Yadav u la leit khlem jingbit sha Dubai ban ïakynduh ïa u Ravi Uppal bad Sourabh Chandrakar bad u la ïadon bynta ruh ha ki jingïakynduh kiba heh ba la pynlong da ka Mahadev App. La ong ba ïa ka jinglut jingsep jong une u pulit ban leit ban wan la bei da ka M/s Rapid Travels jong ki Ahuja Brothers – kaba long ka shlem pynïaid pisa bad ka kompani kaba pynïaid ïa ki tiket jong ka Mahadev App. Une u pulit u la long kum u nongshim pisa na ka bynta ki heh sorkar bad ‘riew saiñpyrthei ka Chhattisgarh.
Ïa u Asim Das bad u Bheem Yadav la wanrah hakhmat ka ïingbishar bakyrpang ha Raipur bad la ai hukum ban tohkit ïa kine na ka bynta 7 sngi.
