Mumbai, Naiwieng 05
Ka phlim ‘Rapture’, ba la direk da u Dominic Sangma, mynta u snem ka la ïoh kheit ïa u soh ka jingjop ha ka Asia Pacific Screen Awards (APSA) kaba la long ha ka Sngi Thohdieng ha HOTA Gold Coast, Australia.
Ka phlim ka la ïoh pdiang ïa ka khusnam ‘Cultural Diversity Award’, kum ka dak jingithuh halor ka jingsynñiang ba kham pher jong ka ban kyntiew ïa ki lariti bapher-bapher haba phai sha ki karkhana shna phlim.
Ka ‘Cultural Diversity Award’, ba la ai da ka APSA, ka ai ka jingithuh ïa kito ki phlim kiba pyninam bad batai shaphang ka lariti, ban kyntiew ïa ka jingsngewthuh bad jingai burom ïa ki lariti bapher-bapher.
Ka phlim ‘Rapture’ da u Dominic Sangma ka kdup shisha ïa ka nongrim jong kane ka khusnam lyngba ka jingïathuhkhana kaba bang bad ka jingwad bniah ïa ki jingshem ba long kyrpang jong ka lariti.
Hynrei ka jingithuh kam shym la sangeh hangne. Ha kane kajuh ka sngi, ha ka Jio MAMI Mumbai Film Festival, ka ‘Rapture’ ka la ïoh pdiang sa ïa ka ‘NETPAC Award’ – kaba la nang pynskhem shuh-shuh ïa ka haba phai sha ka jylli jong ki karkhana pynmih phlim.
Kane ka jingjop ïa 2 tylli ki khusnam ka dei ka jingpynshisha ïa ka jinglah jong ka phlim ban tam ïa u pud bad ban pynïasoh ïa ki nongpeit ha ka rynsan ba-heh jong ka pyrthei.
U Dominic Sangma, u nongpynwandur ba tbit jong ka ‘Rapture’, u la ai nam ïa kine ki jingjop sha la ka jaidbynriew bad ki nongshong shnong ka Meghalaya. Ki kam jong u ki kdew ym tang ïa ka jingseisoh shimet hynrei ki ïeng ruh kum ka tyllong jong ka jingsarong na bynta ka ri jong u bad ki jingdon-jingem jong ka pateng jong u. Ka jingminot u Sangma ha ki kam ïathuhkhana bad ka jingpynneh-pynsah ïa ka lariti ka paw shai haba ngam jylliew bad ka jingshisha jong ka ‘Rapture’.
Ka ‘Rapture’ ka dei ka phlim kaba paka – ym tang ba ka pynbyrngia hynrei ka hikai bad ai mynsiem kumjuh. Ka jingminot u Dominic Sangma ban pynneh-pynsah bad ïasam ïa ka lariti ba kyrpang jong ka Meghalaya ka long ka sakhi ïa ka bor jong ki kam shna phlim kum ka lynti na bynta ka jingïakylliang bad jingsngewthuh ïa ka lariti.
Ka kam jong u ka la wanrah ïa ka jingbhabriew bad jingïar jong ka Meghalaya sha ka rynsan jong ka pyrthei bad kan ïai bteng ban ieh shadien ïa ki jingsahkynmaw ha ki kam pynmih phlim.
