Shillong, Naiwieng 05
Ka National People’s Party (NPP) Meghalaya Unit kan sa pynbna noh ïa u kyrtong mynta u Naiwieng ban ïakhun ïa ka ilekshon Member of Parliament (MP) Lok Sabha na Shillong bad Tura konstitwensi.
Kane ka jingpynkhreh ka seng ban pynbna noh ïa u kyrtong ka wan hadien ba u Bah Prestone Tynsong u la shah jied kum u President bathymmai ka NPP Meghalaya Unit hadien ka jingieh-noh kam u President ba-rim Dr. W.R Kharlukhi.
Wat la ka Lok Sabha Tura konstitwensi ka dei ka bhah ba la jop lypa da ka seng NPP ka Agatha Sangma, hynrei u Bah Prestone u la kren artatien ba ka Agatha Sangma kan ïoh biang ïa ka tiket na ka NPP namar u ong ba lada dei ka MP ba mynta hap ïaid katkum ki kyndon ka seng haba pynbna ïa u ne ka kyrtong.
Kaba kham jwat shuh ïa ka seng NPP ha Shillong konstitwensi ka dei namar haduh mynta ym shym la pyni dak ïano ka seng kan ai tiket ban ïakhun pyrshah ïa u MP ba mynta uba dei na ka seng Congress u Bah Vincent H Pala.
Ha kine ki sngi ki la mih lai ngut ki kyrteng kaba ki nongïalam ka NPP ki la pynsngew, kata kaba nyngkong ka dei jong u Bah HM Shangpliang, uba dei u MLA barim ka Mawsynram konstitwensi uba la dep rung dkhot pura sha ka seng NPP ha kine ki bnai bala dep. Hadien kata ka la mih sa ka kyrteng u Pa’iem Laborius Syiem bad kaba khatduh ka dei jong u Bah George B Lyngdoh, MLA barim ka Umroi konstitwensi na ka seng TMC. Haba pyrshang ban kylli ïa u Bah Prestone hadien ba u la shimti kum u President ka NPP Meghalaya Unit, u la ong ba ki don bun kiba don ha ka thup ba ki kwah ïakhun ilekshon MP, hynrei ïa mynta ki dang buhrieh ïa ka kyrteng.
Kum ban shu pynkynmaw, ka NPP kaba dei ka seng kaba bat ïa ka bor synshar ha ka sorkar jylla ka dei kaba ïoh bun ‘vote’ tam lada kheiñ lang ïa baroh ki ‘vote’ kiba la thep sha ka seng ha ki 36 tylli konstitwensi kiba dei ban thep vote ha ka MP Lok Sabha na Shillong konstitwensi.
Haba phai sha kiwei ki seng saiñpyrthei, ka UDP kan sa shong ïa ka Core Committee ha ka 7 tarik mynta u bnai ban ïaphylliew jingmut ïa ki hynriew ngut kyrteng kiba pynpaw ba ki kwah ban ïakhun ïa ka ilekshon MP.
Ha ka UDP ki don 6 ngut kiba pynpaw ba ki kwah ïa ka tiket, kita ki long u Bah Paul Lyngdoh uba dei Myntri ka Sorkar Jylla, Bah PT Sawkmie u MLA barim ka Mawlai, Bah Jemino Mawthoh u MLA barim ka Nongthymmai, Bah Titos Chyne u MLA barim ka Sohra bad MDC ba mynta, u Bah Robertjune Kharjahrin u President ka HYC u ban sa shongthait noh bad u Dr. D.R.L Nonglait uba dei President ka Khasi Author Society (KAS).
Ki seng kiba la dep pynbna kyrtong ki long ka Congress kaba la don lypa ïa u MP u Bah Vincent H Pala katba ka VPP ka la pynbna ïa u Dr. Ricky A.J. Syngkon.
