Shillong, Naiwieng 05
Ka National Institute of Technology (NIT), Meghalaya kam pat ai jingmut pura kumno yn leh ïa ka ïing mala ha Thana Road, Khyndai Lad la yn pynpra noh ne ym pat donkam pynpra hadien ba shah pynjulor ha ka ding kaba klang ha ka 14 tarik u Risaw.
Ka tyllong khubor ka ïathuh ba ka NIT ka la phah ïa ka kaiphod hynrei kam shym la ai kano-kano ka jingpynkut kumno yn leh ïa kane ka ïing mala kaba ka la shah pynjulor ha ka ding bad lah ban buh jingma ïa ki ïing kiba don marjan.
Ka tyllong khubor ka ong ba dang donkam shuh shuh ban pan jingmut biang sa na ka NIT Guwahati namar ka don kham bun ngut ki riewshemphang kiba lah ban ai jingmut bad phah ka kaiphod kaba tikna ka ban batai shai, la ka donkam ne em ban pynpra noh baroh kawei ka ïing khnang ban nym buh jingma ïa kiwei pat ki ïing kiba don sawdong katei ka jaka.
Ka jingtohkit da u majistor ruh kam pat dep namar ba don ka Puja ha ki taïew ba la leit ha kaba ym shym la lah ban pyndep hapoh 10 sngi. La khmih lynti ba ka jingtohkit bad ka kaiphod yn phah noh mynta ka taïew.
Ka jingpluh kaba la jia ha ka 14 tarik u Risaw, ka la bamduh ïa ka ïing baroh kawei bad ki jingdon jingem baroh.
La ong ba kane ka ïing dewbilat kaba jrong bad don bun mala, ka don ruh bun tylli ki kudam hapoh jong kane ka ïing. Ïa kane ka ïing la dei trai da u hehspah u bym dei u trai muluk.
