Shillong, Naiwieng 06
Ka Sorkar Jylla lyngba u Myntri Rangbah u Conrad K Sangma lem bad ka Myntri ka koit ka khiah, ka Kong Ampareen Lyngdoh ka la shim katto-katne ki sienjam da kaba phai sha ki jingduna kiba don ha ki jaka ai jingsumar lem bad ki jingdonkam jong kiba shakri ha ka liang ka kam ai jingsumar.
Haba kren sha ki lad pathai khubor hadien ka jingïalang bad u Myntri Rangbah kumno ban pynbha ïa ki jaka ai jingsumar bad ka rukom ai jingsumar, ka Kong Ampareen ka la ong ba ha ka jingïalang la phaidien katto-katne haba ïadei bad ki jingai jingshakri ki jaka sumar naduh ki aspatal, CHC, ki PHC, dispensary bad kiwei kiwei kynthup ka jingduna briew kiba trei ha jaka sumar.
Ka Kong Ampareen ka la ong ba kane ka dei kaba shisha ba ki jaka sumar ki duna briew naduh ka jingduna ki doktor, ki doktor kiba sumar kyrpang ïa ki jingshitom (specialists) bad ki nos kiba trei, nalor ki ïing ban pynsah ïa ki nongtrei kiba leit ban trei sha ki jaka sumar kiba kham eh.
Ka la ïathuh ba kawei na ki rai ba la shim ki long ban peit ïa ki jingduna khamtam ki jingdonkam jong kito kiba ai jingshakri ha ki jaka kiba kham eh da kaba pynbiang ïa ki jaka sah bad kiwei ki jingdonkam.
La rai ruh baroh kiba trei ha ki jaka ai jingsumar ka Jylla ki hap mad ïa ki jaka trei kiba kham eh da kaba ngat ban leit trei sha kiwei ki jaka kiba jngai, ha kaba ka sorkar kan sa buh ruh ïa ki jaka sah bad ki jingdonkam baroh na ka bynta ki nos bad ki doktor. Namar kata, ka la ong ba ka long kaba donkam eh ban kyntiew ïa ki lad jingsumar ha ki jaka bad ki shnong ki thaw. Kumta ka Myntri ka la ong ba ha kane ka jingïakynduh, ka tnat ka koit ka khiah ka la pyntip sha u Myntri Rangbah ïa ki jingduna ki nongsumar, ki nos bad kiwei ki nongtrei hapoh ka jylla. Ka Kong Ampareen ka la ïathuh ba yn sa ïakren biang bad u Myntri Rangbah ka jylla ban peit ïa ki lad ki lynti kiba ka sorkar kan leh ban kyntiew ïa ka koit ka khiah hapoh ka jylla.
Ka Myntri ka la ïathuh ba la khmih lynti ba hapoh ki 24 bnai ne 36 bnai, yn sa lah ban nang weng ïa ki jingeh bad jingduna ha kaba yn don da ki mat treikam (policy) kiba ka tnat ka koit ka khiah kan pyntreikam.
