Jowai, Naiwieng 06
Ban wanrah ka jingsngew ïajan para dkhot bad ban pynrung ïa ka mynsiem ieid ri ha ki samla, ka National Cadet Corps (NCC) ka la pynlong da ka jingïaid rally sha ki jylla ka thaiñ shatei lam-mihngi ne Car Rally North Eastern Region ha ka jingjngai kaba 3500 km.
Kane ka ‘Car Rally’ kaba la pynlong halor ka phang ‘Navigating, Challenging Navigating Challenges, Forging Leaders’ ka long ruh shi bynta ka jingrakhe ïa ka jingdap 75 snem ka NCC.
Ha Jowai ïa kane ka sngi la rakhe ha Multipurpose Hall ka Kiang Nangbah Government College, Jowai ha ka jingdonlang u Major General Gagan Deep, ADG NCC, ka Principal ka Kiang Nangbah Government College ka Dr EM Blah, ki nonghikai bad ki samla pule na ki kolej bad ki skul bapher bapher.
U Major General Gagan Deep, ADG NCC ha ka jingkren u la ong, ka jingkiew jong ka ri bad ka lawei ki khun samla ka shong ha ka jingïatylli bad ka jingdon ïa ka akor burom. U la ong ha ka jingim don artylli ki lynti; kawei ka dei ka lynti kaba eh hynrei kaba beit bad ïalam sha jingbha bad kawei pat ka dei ka lynti kaba suk hynrei kaba ïalam sha ka jingbakla.
La pynphuh pynphieng ïa kane ka sngi da ki jingrwai bad ki jingshad tynrai na ki khynnah ka NCC.
