Shillong, Naiwieng 06
U nongwad RTI, Bah Disparsing Rani u la ong ba ka pisa kaba mih na Civil Hospital, Shillong ha kine ki 3 snem ba la dep ka long palat T.6 klur.
Katei ka la paw lyngba ka RTI ba la ïoh pdiang da u Bah Rani haba ïadei bad ka jingmih pisa na katei ka jaka sumar Sorkar.
“Kane ka RTI ka dei ka ïit-khmih na bynta u paidbah uba don ka hok ban tip haba phah sumar ha jaka sumar Sorkar bad haba u siew pisa, ka pisa ka leit shano,” ong u Bah Rani haba kren sha ki la pathai khubor ha ka Lah Sngi U Blei. U la ïathuh ba ka jingmih pisa na ka jaka peit bniah ïa ka snam ha katei ka jaka sumar ka long T.2,55,24,749 klur katba ha ka ‘X-Ray’ ka long T.4,78, 300 lak. Haba phai sha ka ‘Scanning’, ka jingmih pisa ka long T.57,51,868 lak, katba na ka CT Scan ka long T.2,42,02,060 klur.
U Bah Rani u la ong ruh ba ka jingmih pisa na ka MRI ka long T.2,06,51,900 klur.
“Kumta ka jingmih hangtai (Shillong Civil Hospital) ha kine ki 3 snem ka long T.6,29,18, 877 klur,” u la ong.
Ha kawei ka liang, u la pynpaw ka jingsngewsih naba ka don kawei ka kor MRI kaba dang shu pyndait ha ka 24 tarik Nailur, 2013 kaba la duh noh ha ka 5 tarik Nailur, 2022 bad ka dor jong ka-ka long T.4,90,00,000 klur.
Haba kdew ba ki don ruh ki jingujor kiba u la ïoh pdiang ba ka jingkiew kyrdan ha ka kam ha katei ka jaka sumar kam long katkum ka thup kiba la ha shuwa ne rangbah ha ka kam, u la ong ba haba ïadei bad katei ka bynta, u la ïoh ïa ka thup jong kito kiba la ha shuwa bad rangbah ha ka kam. Na ka liang u Bah Rani haba pynsngew ba ka la don ruh ka jingud halor ka jingbym ïoh tulop jong ki nongtrei kiba trei ha ka por COVID, u la pynkynmaw ba ha ki snem ba la dep, u la ai ïa ka kaiphod bad na ka liang ka Sorkar Jylla ka la ïathuh ba ka la ïoh pisa tang T.77 klur na Delhi hynrei hadien ba pan RTI, ka paw ba ka Sorkar ka la ïoh T.119 klur bad kumta ka pisa kaba dang sah ka long T.43 klur.
“Kata ka dei ka jingud namarba ka Sorkar kam pat ai ïa ka tulop ha ka por COVID sha 27 ngut ki doktor, 100 ngut ki nos, 85 ngut ki ‘Paramedical’ bad 153 ngut ki ‘Grade-IV’. Kine haduh mynta, kiba bun kim pat ïoh tulop,” la ong utei u nongwad RTI.
“Ka jingkylli ka long ba ka pisa kumba la pynshai da ka Sorkar ba ka don T.43 klur ka bym pat pynlut…balei kim ai noh ïa ka tulop sha ki nongtrei,” u la buh jingkylli.
Shuh shuh haba bynrap ba ka Sorkar ka dei ban burom ïa la ki nongtrei, u la kyntu ïa ka Sorkar ban pynkhuid noh ïa ka tulop jong ki nongtrei namarba ka pisa kaba T.43 klur kaba la pynshai ka dang don.
