Shillong, Naiwieng 06
Ka Myntri ka koit ka khiah ka Sorkar Jylla ka Kong Ampareen Lyngdoh ka la ong ba kiba trei mon sngewbha ki ïoh ban trei tang haduh 2 snem katkum ka aiñ, bad ynda la kut ka samoi treikam, hap ban ailad sa ïa kiwei pat ban shimti ïa ka kam.
Ka Myntri ka la batai ïa kane haba kren shaphang ka rukom trei ki ASHA kum ki nongtrei mon sngewbha bad ki jingmyntoi kiba ki ïoh kum ki nongtrei mon sngewbha na ka tnat ka koit ka khiah jong ka Sorkar.
Ka Kong Ampareen ka la ong ba ha ka jingïasyllok jong ka bad ka tnat ka koit ka khiah ha ryngkat ka jingdon lang u Myntri Rangbah, u Conrad K Sangma, la ïoh jingtip ba katkum ka aiñ, ki briew kiba trei mon sngewbha kin ïoh ban trei haduh 2 snem, bad ynda la kut ka samoi treikam, yn hap ban ailad sa ïa kiwei pat ban shimti ïa ka kam, ym ban ïohlad ban trei da kijuh shi kijuh ki briew.
Halor ka jingong ba ym ïoh jingsiew ki nongtrei ASHA ha ki por kiba la dep, ka Myntri ka la ong ba ka Sorkar MDA-1 ka la peit bniah bad ka la lah ban ai ïa ki jingsiew kiba sah jong ki nongtrei ASHA.
Ka Kong Ampareen ka la ong ba ka la dep ban ïakren bad ki nongtrei ASHA bad ka la don ka jingïathir halor ki jingdawa jong ki, kiba kynthup ïa ka jingsumar ei kaba ym donkam ban siew pisa bad ka jingthung kam bad ka jingweng kam ïa ki nongtrei ASHA kiba trei mon sngewbha.
Kumta ka la kyntu ruh ïa ki Dorbar Shnong ban ïatreilang bad ka Sorkar, namar ka don ïa ka iktiar ban shimti ïa ka kam.
Ka la ong ba ka Sorkar kan sa pynkhlaiñ ïa ki jinghikai sha ki Dorbar Shnong, bad ban ailad ïa ki Nos, bad kiwei de kiba don ïa ka jingnang jingtip shaphang ka pule puthi kaba ïadei bad ka koit ka khiah ba kin don bynta lang ban ai jingsumar ïa ki briew kiba shitom ha ki shnong ki thaw.
Ha kajuh ka por, ka Kong Ampareen ka la kyntu ruh ïa ki nongtrei ASHA ba ki dei ban don ka jingïatreilang bad ban burom lang ïa ki Dorbar Shnong khnang ban kiew ka koit ka khiah ha ka Jylla.
Shuh shuh, ka la khot bad wer biang ïa ki nongtrei ASHA ba kin wanphai biang sha ka kam kaba ki trei mon sngewbha, da kaba bynrap ruh ba ym pat lah ban ai kano- kano ka jingkular sha ki nongtrei ASHA, hynrei kim dei ban ieh ïa ka kam kaba ki trei shiteng por.
