New Delhi, Naiwieng 06 (UNI)
U Myntri ka Sorkar Delhi, u Saurabh Bharadwaj, ha ka Lah Sngi U Blei u la ïathuh ba hadien ka jingïakynduh jong ki MLA ka AAP, la rai ba lada u Myntri Rangbah, u Arvind Kejriwal, u shah kem, un pynïaid ïa ka sorkar na patok.
U Kejriwal u la khot ïa jingïalang jong ki MLA ka AAP hadien ba u la ïoh pdiang ïa ki shithi na ka Enforcement Directorate ban wan mih ban shah tohkit.
Haba kren sha ki lad pathai khubor, u Bharadwaj u la kynnoh ba ka sorkar BJP ka sngewthuh ba kam lah ban weng ïa u Kejriwal na ka bor lyngba ka ilekshon, bad yn lah ban weng tang lyngba ki kam ïasylla.
“Kam don kyndon satia ha ka Riti Synshar kaba bthah ba u Myntri Rangbah un hap ban iehnoh kam lada u shah set patok,” la ong u Myntri.
Watla katta ruh, u Bharadwaj u la ong ba lada u Myntri Rangbah u shah kem, un bteng ban treikam bad ban shong jingïalang bad ka kynhun Myntri bad ki heh sorkar na patok katba ki MLA kin pyntreikam ïa kita ki rai.
Na ka liang ka Atishi, kaba long kawei na ki Myntri, ka la ong ba ka AAP kan ym pynkheiñ ïa ka jingshaniah kaba ki nongshong shnong ka Delhi ki la ai ha sorkar. U Kejriwal un ïai bteng ban shakri ïa ki paidbah na patok, ka la bynrap.
Ha katei ka jingïalang, ka Atishi ka la ong ba ka la don ka jingïakynduh jong baroh ki MLA bad u Kejriwal ha kaba ki la pynpaw ba ki paidbah ki sngew ba ka sorkar u Myntri Rangbahduh, u Narendra Modi, ka lehbeiñ ïa ka AAP bad ka la tam ïa baroh ki pud.
