Shillong, Naiwieng 06
Ka Ri-Bhoi Mihngi Pres -bytery kaba hap hapoh Ri-Bhoi Presbyterian Synod ka la pynpaw ïa ka jingsngewdiaw bad ka jingsngewkhia halor ka jingpynkut jong ka sor-kar jylla lyngba ka tnad kam jngoh kai pyrthei ïa ka tamasa Cherry Blossom ha ka Sngi U Blei kata ha ka 19 tarik u Naiwieng, 2023.
Kum ban shu kdew hangne, ïa katei ka tamasa Cherry Blossom yn pynsdang naduh ka 17 tarik u Naiwieng, 2023 bad yn pynkut pat ha ka 19 tarik u Naiwieng 2023 ha madan Kurkalang Bhoirymbong. Ha kine ki khyndiat sngi kiba la dep la ïohi ruh ba ki kynhun bapher-bapher kiba don hapoh Ri-Bhoi ki la pyrshah jur ïa kane ka jingpynkut jong ka sorkar ïa katei ka tamasa ha ka Sngi U Blei. Haba kren sha ki lad pathai khubor, na ka liang u Pastor H. Moksha uba dei ruh u Moderator jong ka Ri-Bhoi Mihngi Presbytery u la ong ba katkum ka rai jong ka Standing Committee jong ka Ri-Bhoi Mihngi Presbytery kaba la long ha ka 4 tarik u Naiwieng 2023, ba ka Ri-Bhoi Mihngi Prebytery kaba kynthup ïa 41 tylli ki Balang naduh ki thaiñ Umshew, Pynthor, Mynsaiñ, Bhoirymbong, Kyrdem, Ïapngar ter ter shaduh sha ki thaiñ Umtlieh ka pynpaw ïa ka jingbym sngewtynnad, ka jingsngewsih, ka jingsngewkhia halor ka jingpynkut jong ka sorkar jylla ïa katei ka tamasa ha ka Sngi U Blei namar ba ka jingpynkut ïa katei ka tamasa ha ka Sngi U Blei kaba long ka sngi kaba la ñiew kyntang da ki khristan ka ktah jur bad ka ïuhroit ïa ka jingsngew kyntang jong ki riewngeit Khristan kiba don hapoh Ri-Bhoi District bad kumjuh ki khristan kiba don hapoh ka jylla hi baroh kawei.
“Ka jingpynkut ïa kane ka tamasa ha ka Sngi U Trai kaba long ka sngi kaba la ñiew kyntang da ma ngi ki khristan ka ktah jur bad ka ïuhroit ïa ka jingsngew kyntang jong ngi kiba ngeit ha kane ka thaiñ bad kumjuh ruh ïa ki khristan kiba don ha ka jylla Meghalaya hi baroh kawei”, la ong u Pastor Moksha.
