Shillong, Naiwieng 06
U nongwad RTI ba paw ka jylla, u Bah Disparsing Rani u la pyntip ba ka jingpyntreikam ïa ka surok na Shillong sha Dawki kaba katkum ka bui kaba u la ïoh ha ka 23 tarik Risaw 2023, la ong ba la dep ban pynbna ba ïa ka jingpyntrei thymmai ïa ka surok la aiti sha kawei ka kompani kaba la tip kum ka M/S BCC Tech Pvt Ltd bad katei ka kam ka la ïaid mynta shakhmat ha kaba la buh por ban pyndep haduh 2 snem ïa ka bynta kaba nyngkong kata na ka surok kaba naduh na Umshyrpi shaduh Umdiengpun.
Haba kren sha ki lad pathai khubor ha ka Lah Sngi U Blei ha Shillong Press Club, u Bah Disparsing u la ong ba ha kaba ïadei pat bad ki bynta ba bud jong ka projek, katei ka kam ka dang ïaid shaid-shaid bad ha kaba ïadei pat bad ka projek Shillong Eastern By-Pass kaba na Mawlyngkhung -Mawryngkneng-Jowai -Ratacherra ha ka jingjrong kaba 138 kane ruh ka dang ïaid. Na ka liang u Bah Rani u la kyntu ruh ïa ki paidbah, ki dorbar shnong bad ki sengbhalang ban don ïa kawei ka thong bad kata ka long ban ailad ha ka ban shna pyndep noh kloi ïa kine ki surok namar kane ka jingsahteng ban pyndep ïa ki surok ka long ka jingduhnong kaba khraw bha ïa ka jylla baroh kawei. Kane ka jingkyntu jong u kumne ka dei namar ki la ju mih teng ki khubor ba ki don katto-katne ki briew kiba pynthut ïa ka kam kaba pynlong ruh ha kajuh ka por ba kan sahteng.
“Nga kyntu ïa ki paidbah, ki dorbar shnong bad ki sengbhalang ba lada long kumno-kumno ki dei ban buh lang kawei ka thong kumno ban pyndep kloi ïa ka surok, ngim dei ban buh mawjynthut ïa ka kompani namar ka dei ka jingduhnong ïa ka jylla baroh kawei”, la ong u Bah Disparsing. U Bah Disparsing u la ong ba lada ka jingshah pynwit hangne-hangtei ha ka ban pyndep shna ïa ka surok kata ka long kaei-kaei ka jingpynlehraiñ ïa ka jylla namar ba ha kiwei kiwei ki jylla, la ïohi ba haba wan trei ki kompani ki tip shai ba haba ka projek ka la dep, ki nongtrei ki ju leit phai noh bad kim ju sah duh hangne.
“Ngi ruh ngin bud ïa ki nuksa jong kiwei ki jylla kum ka Mizoram, ka Manipur ba ngin ailad ïa ki nongtrei ba kin pyndep ïa ka kam bad ym dei ban pynthut khnang ba ka jingpyntrei jong ka jylla kin ïaid bad ba ka jingangnud jong u paidbah kan urlong ha ka por kaba biang”, la kubur u Bah Disparsing.
