Shillong, Naiwieng 07
Ki nongtrei ASHA hapoh ka jylla kiba don hapoh shatri jong ka Meghalaya Asha Worker’s Union (MAWU), ha ka Sngi Ba-ar ki la wan shakhmat ban pynshai halor ka jingkam jong ka Myntri ka tnad ka koit ka khiah ka sorkar jylla, ka Dr. Mazel Ampareen Lyngdoh ba ki nongtrei ASHA ki ïoh ïa ka jingsiew kaba haduh T.5,000 shibnai.
Haba kren sha ki lad pathai khubor ha Shillong Press Club, ka President ka MAWU, ka Kong Mira June Myrsing ka la ong ba ki nongtrei Asha ki pynpaw ïa ka jingbym shai halor ka jingkren jong ka Myntri ha ki sngi ba la dep sha ki lad pathai khubor ba ki nongtrei Asha ki ïoh ïa ka bainong kaba haduh T.5,000 shibnai bad ba ki nongtrei Asha ki la kubur ïa kane.
“Ka Meghalaya Asha Worker’s Union hapoh ka jingïalang ryngkat bad ka Myntri ka koit ka khiah, ki khlem kubur eiei ba ki nongtrei Asha ki ïoh ïa ka T.5,000 hynrei ngi la ong ïa ka Myntri ba ngi khlem lah ban ïoh ïa ka T.5,000 bad kaba lyngngoh ka long ba ngi la ïohi pat ba ka jingkren jong katei ka Myntri ka la ong ba ki nongtrei Asha ki la kubur ïa kata”, la ong ka Kong Myrsing.
Ka Kong Mira Myrsing ka la ïathuh ba haduh mynta kum ki nongtrei ki khlem pat ïoh ïa kata ka pisa kaba T. 5,000 hynrei ka jingsiew kaba ki ju ïoh na ka por sha ka por ka long beit thik tang T.2,000 katba T.800 pat ka dei kaba la siew da ka National Health Mission (NHM) ha ka shibnai.
Ha kaba ïadei pat bad ka jingkren jong ka Myntri ka tnad ka koit ka khiah da kaba ong ba ki nongtrei ASHA ki dei tang ki nongtrei mon sngewbha, na ka liang ka Kong Myrsing ka la pynpaw ïa ka jingsngewsih bad kum ki nongtrei Asha kim lah ban pdiang ïa ka jingkam jong ka Myntri ba ki Asha ki dei tang ki nongtrei mon sngewbha.
“Lada ngi dei ki nongtrei mon sngewbha, kam dei ban khot ïa ki Asha ba kin trei noh mardor ïa ka kam hynrei kum ki nongtrei mon sngewbha ki lah ban trei katba ki mon”, la kubur ka Kong Myrsing.
Shuh shuh katei ka kynhun ka la pynpaw ruh ka jingsngewlyngngoh halor ka jingpynïasyriem jong ka Myntri ïa ki nongtrei Asha bad ki MLA, na ka liang ka Kong Myrsing ka la ong ba wat da ki MLA ruh kin nym mynjur satia ïa kane ka jingong jong ka Myntri namar ba ki MLA ruh ki don ïa la ka jong ka jingïoh ba kin ïoh manla u bnai.
Na ka liang ki nongtrei Asha ki la shim da ka rai ban pynlong da ka jingïakhih kata da kaba sangeh treikam ha baroh kawei ka jylla lada ka sorkar kam pynurlong ïa ki jingdawa.
