Nongpoh, Naiwieng 07
Ka nongbah Delhi ka dei kawei na ki sorbah kaba la bna nam kum kata ka sor kaba jaboh tam ka lyer kaba buh jingma shikatdei ïa ki paidbah kiba sah bad kumjuh ruh kiba leit donkam ha katei ka jylla. Ha ka jingleit hiar jong ki katto-katne ki nongthoh khubor sha katei ka nongbah ban sakhi ïa ka tamasa World Food India (WFI) kaba lai sngi lynter la ïohi ba wat ka sngi ruh kam lah shuh ban ksam lyngba ïa ka jingjaboh jong lyer.
Hynrei wat hapdeng katei ka jingjaboh jong ka lyer, la ïohi ba ki paidbah ba kynthup ïa ki trai shnong bad kumjuh ruh ki nongwan jngohkai pyrthei ki mih beit shakhmat ban beh sha ki kam ki jam kumba ju long khlem jingsalia. Kane ka la paw ruh ha katei ka tamasa pyninam ïa ki jingbam kaba heh bha kaba la pynlong da ka tnat Food Processing Industry jong ka ri kaba la wan ban sakhi da ki hajar ngut ki briew ba kynthup naduh ki nongïashim bynta, ki nongthied, ki kompeni shna jingbam bapher bapher bad kiwei kiwei.
Kum ban shu pyntip khyndiat ïa katei ka tamasa WFI kaba lai sngi lynter la pynlong ha Pragati Maidan jong ka nongbah Delhi kaba la wan plie da u Myntri Rangbahduh ka ri, u Narendra Modi ha ka 3 tarik Naiwieng 2023 bad la pynkut pat ha ka 6 tarik u Naiwieng 2023 da ka President jong ka ri, ka Droupadi Murmu.
Ha kitei lai sngi lynter jong katei ka tamasa, la ïohi ïa ki hajar ngut ki paidbah kiba la wan tuid sha katei ka jaka ba kynthup naduh ki heh ophisar jong ka ri, na ki jylla bapher bapher, kumba 1208 ki nongïashim bynta ban pyninam ïa la ki marbam, ki jingdih bad ki tiar teknoloji kiba ïadei bad ka bam ka dih, 715 ngut ki nongthied kiba la wan na kylleng ki ri ka pyrthei bad kumba 218 ngut kiba dei na kane ri. Ha kane ka tamasa, la ïohi ruh ïa kumba 14 tylli ki ri ka pyrthei kiba la buh ïa la ki jong ki dukan pyninam ban pynïaid ïew ïa la ki marbam kiba thymmai bad la wan ruh ban ïashim bynta kumba 97 ngut ki heh spah na ki kompeni bapher bapher.
Kaba kham sngewtynnad ha kane ka tamasa WFI, ka dei ka jingleit ïashimbynta jong ki 16 ngut ki nongrep na Meghalaya kiba la pyninam ïa la ki mar rep kiba pawnam na ka jylla ym tang ha ka ri, hynrei ha kylleng ka pyrthei namar ka jinglong kyrpang jong ki bad kiba don ruh ïa ka bor dawai, kiba la pynmih na u Sohñiamtra, u shynrai Lakadong, u Sying, Slasha bad shibun kiwei kiwei kiba la khring ïa ki nongthied bad ki kompeni bapher bapher na ka ri bad na shabar ri ruh kumjuh.
Ka jingkiew jong kitei ki nongrep ban poi shaduh katei ka thong ka dei namar ka jingshimkhia bad ki lad jingïarap jong ka sorkar jylla ban bei tyngka bad hikai ïa ki naduh ban pynïaid ïew ïa ki mar ki jong ki, ban pynbiang ïa ka rukom song lane kata ka packaging, ban ai ïa ka kyrteng kaba biang bad kiwei ki jingdonkam katkum kane ka juk kaba mynta.
Haba ïoh ban ïakren bad ki katto katne ki samla kiba la wan ïashim ha kane ka tamasa, ki la pynpaw ïa ka jingkhublei ïa ka sorkar jylla bad kyrpang eh ïa ka tnat Food Processing halor ki lad jingïarap kiba ki la ai ban pynlong ïa ki kumba ki long haduh kumne ban kin paw ym tang ha ka ri, hynrei wat shabar ri ruh kumjuh bad ba ki la lah ban aikam ruh ïa bun ki samla bad nongrep ha ki thaiñ ki jongki.
Kane ka jingnang kiew jong ki samla ka jylla ha kane ka bynta, ka long da shisha kaba ai mynsiem bad pynshlur ruh ïa kiwei ki samla khlem kam khlem jam kiba la don ïa ka jingnang jingtip bad jingshemphang ba kin sdang seng kam lajong bad lyngba kane kan ïarap ruh ïa kiwei pat ki samla ba kin ïohkam pateng la pateng bad khlem pep lyngba ka jingshimkhia bad btin lynti jong ka sorkar jylla, kin poi sha ka thong kaba ki thmu kumba long lem kine ki samla kiba la mihkhmat ïa ka jylla ha ka tamasa WFI.
Lyngba kane ka tamasa, ka sorkar jylla ka la ïoh ruh ban ïa soi soskular (Memorandum of Understanding) bad ka Lulu Group, Hypermarket LLC na ka bynta ban shalan ïa u Sohtrun (Kew Pineapple) bad u Sohniamtra (Khasi Mandarin) sha bar ri kumba kine ki jait soh ki dei ki pawnam bha ha ka pyrthei khamtam ha ki ri Gulf.
Ïa ka MoU la ïa soi hapdeng ka Secretary jong ka tnat Agriculture & Farmers Welfare, ka Kong Iasawanda Laloo bad katei ka Lulu Group, Hypermarket LLC ha ka jingiadon ryngkat ka Myntri Kong Ampareen Lyngdoh bad kiwei kiwei ki heh ophisar na ka jylla.
Kum kawei na ki jylla kaba la shah phai khmat kyrpang ha kane ka tamasa, lane kata ka focus state, ka Meghalaya Pavilion ha katei ka tamasa ka dei kaba kham pher kaba kaba ishongkhun haduh katta katta naba la shna kyrpang da ki jingthaiñ siej katkum ka jinglong kyrpang jong ka jylla ïa kaba la wan ban plie paidbah da ka Myntri ka tnat rep ka jylla, ka Kong Ampareen Lyngdoh ba la synran lang da ka Secretary ka tnat Kong Isawanda Laloo lem bad kiwei ki heh ophisar.
