Shillong, Naiwieng:
Haba ïasnohktilang bad ka National Cadet Corps (NCC) ban rakhe ïa ka jingdap 75 snem jong ka, u Myntri Rangbah ka Jylla, u Conrad K. Sangma u la kaweh lama ïa ka ‘Northeastern Region Car Rally’ kaba la long ha ka Lah Sngi U Blei ha U Soso Tham Auditorium, Shillong.
“Nga kwah ban ai khublei ïa ka NCC halor ka jingtrei minot jong ka ban tei ïa ka ri lyngba ka jingpynwandur ïa ka jinglong bad ban bsut ïa ki nongrim jong ka mynsiem ieid ri ha ki samla jong ngi mynta la 75 snem kynthih. Kane ka sienjam jong ka ‘rally’ ki kali ka long kaba kongsan bad kaba kit jingmut naba ka pynbiang ïa ki samla jong ngi ka kabu ban ïakynduh ïa ki briew na kiwei-kiwei ki thaiñ. Kane ha kawei ka liang kan pynïakynduh ïa ki bad ki briew bapher-bapher kiba trei ïa ki kam bapher-bapher, lariti, ktien bad jaidbynriew bad kan wanrah ruh ïa ka jingïaithuh, jingïatylli, jingïasngewthuh jingmut bad ka burom iwei-ïa-iwei. Nga ai khublei ruh ïa ka Maruti Suzuki kaba la kyrshan ïa kane ka prokram bad nga kwah ban ïohi ïa kane ka ‘rally’ ym tang hapoh ka Thaiñ Shatei Lam Mihngi, hynrei ban ai lad ruh ïa ki samla jong ngi ban leit sha kiwei-kiwei ki bynta jong ka India,” ong u Sangma haba kren ha ka jingïalang.
U la kner ruh ïa ka jingkyrshan sha ka NCC bad kdew ïa ki prokram bapher-bapher jong ka Sorkar, ba kynthup ïa ka ‘YESS Meghalaya’ kaba ai ka jingkyrshan pisa sha ki khun samla haduh T.1 lak na bynta ki prokram bapher-bapher ba la pynlong ha ka imlang-sahlang jong ki bad ka Sorkar ba mynta ka la kyrshan ruh ïa 3000 tylli ki kynhun da ka jingïohi jngai ban kynjoh sha 10,000 tylli ki kynhun hadien habud.
U la kren ruh shaphang ka Meghalaya Grassroots Program, kaba pynbiang ïa ka jingkyrshan pisa bad plie lad ïa ki khun samla kiba don sap ha ka put ka tem ban sei madan la ki sap ki phong ha ki jaka bapher-bapher ba kynthup ki jaka jngoh kai, jaka bam bad ki prokram kyrpang ha kylleng ka Jylla.
“Ha ka kylla nyngkong, ngi la kyrshan pisa ïa 1500 ngut ki samla. Mynta u snem, ngin leh arshah ïa kane bad pyrshang ban kynjoh sha kumba 3000 ngut ki ‘riew don sap lyngba ka ‘Meghalaya Grassroots Program’,” u la ong.
U Sangma u la ong ruh ba ki samla ki long ki jingdon-jingem ba kongsan naba ka jingbun paid hapoh ka ri ka bun bha haba phai sha ki samla. U la ban jur ba lada pyndonkam hok ïa ka sap ka phong ki samla ha ka rukom ba dei, kin long ka bor kaba khlaiñ bha.
Ka ‘Special Outreach Program’ kaba la kaweh lama na Shillong, ha kaba ka kynhun ki 12 tylli ki kali ‘Maruti Suzuki Jimmny’ ba la kyrshan da ka Maruti Suzuki kin sam lyngba sha baroh ki Jylla ka Thaiñ Shatei Lam Mihngi, lait noh ka Manipur namar ki daw ba ïadei bad ka jingshngaiñ bad yn pynkut ha Guwahati ha ka sngi ba rakhe ïa ka ‘NCC Day’.
Katei ka prokram ka dei ka jinglum ïa ka jingïasnohktilang jong ka NCC bad kiwei-kiwei ki kynhun ba kynthup ïa 277 tylli ki skul, 151 tylli ki kolej na 44 distrik jong ki 6 Jylla. Ka jingthmu ba hakhmat eh jong katei ka ‘Car Rally’ ka long ban kyntiew ïa ka jingïadei ba ïajan hapdeng ki samla, ban ai mynsiem ïa ki na bynta ka jinglong nongïalam bad ban pynrung ïa ka jingmut ba jylliew jong ka jingieid ri. Katei ka jingrakhe ka long ban pyni ïa ka jingïatylli, jinglong nongïalam bad jingieid ri, baroh kiba dei ki nongrim jong ka NCC.
Ha kane ka sngi la ïadonlang ruh u Chairman of Meghalaya State Planning Board, Bah Metbah Lyngdoh, Major General Gagan Deep, ADG, NCC Directorate Northeastern Region, Ram Suresh Akella, Executive Director-Marketing, Maruti Suzuki India Limited, Commissioner Secretary, Director General of Meghalaya Police, District Commissioner East Khasi Hills lem bad kiwei-kiwei.
