Shillong, Risaw 07
Wat la ki Karbi kim shym la pyndik shuh ïa ki Khasi haba ki leit ot kba sha ki lyngkha, hynrei mynta pat ki (Karbi) la pyndik ïa ki Khasi kiba sah ha Lapangap da kaba leit tuh ïa ki sying kaba ki la rep shitom na ki lyngkha ha ka por mynmiet.
Haba ïakren bad u Waheh Shnong Lapangap, Bah Deimonmi Lyngdoh, u la ai khublei ïa ki pulit Assam bad Meghalaya kiba la ïada ïa ki nongshong shnong Lapangap ban leit sha ki lyngkha kaba don ha jaka ba sah ki Karbi ban leit ot ïa u kba kaba ki la dep rep ha kine ki snem.
U la ong ba kine ki Karbi ki la leit ban tuh pat ïa ki sying kiba la rep da ki briew jong ka shnong Lapangap ha khappud jong ki da kaba leit tih ha ka por mynmiet.
“Naduh ba mih ka huri-hura ngim shah shuh ïa ki briew jong ngi ban leit than sha ki jaka ba don markhap bad ki Karbi, dei na kane ka daw ki la sdang ban shim kabu ban tih ïa ki sying ha ka por mynmiet” u la ong.
U la ïathuh ba u sying mynta u rem dor bha namar ha ka shimon kaba mut 40 kilo u poi haduh T.7,000.
Shuh shuh u Bah Deimonmi u la pyntip ba kito ki nongrep kiba rep sying hajan u lum ba la dep thung ki tynrai dieng don ki bym ïoh tih shuh ïalade namar la wan tuh lut ki Karbi.
“Ngi la pyntip sha u Superintendent of Police West Jaiñtia Hills District bad ïa ki magistrate ba ngi la shah tuh ki sying ha ki Karbi” u la ong.
Ha kajuh ka por u la pyntip ba haduh mynta ka la shong suk shong shngaiñ baroh arliang namar ki Karbi kim shym la wan phut shuh ïa ki tynrai dieng, hynrei kam pat shngaiñ ïa ki paidbah ba kin leit rep ha ki jaka ba don ki Karbi.
Halor ka jingthmu ka sorkar Meghalaya bad Assam ban phah pahara da ki CRPF, u Bah Deimonmi u la ïathuh ba lada ki phah ap ha khappud ba kin sah sha khlaw ka biang, hynrei ban sah sha shnong ka eh namar kim sngewthuh ïa ka kren ka khana, katba ïa ki pulit da ki sah ha shnong kam lei-lei namar ki sngewthuh ïa ka ktien.
