Shillong, Naiwieng 08
U MLA ka Voice of the People Party (VPP) na North-Shillong, Bah Adelbert Nongrum u la kyntu ïa ka Sorkar Jylla ban pyrkhing ïa ka jingwan rung u drok sha ka Jylla kumba leh ha ka por jong ka khlam COVID-19.
“Nga pynpaw ïa ka jingpyrshah bad ka jingpynrem halor ka jingjia ha ka 6 tarik Naiwieng, 2023 halor ka jiingïadie ïathied drok haba shit haba shai la kum ba die kwai die sikret khlem don jingtieng ne burom shuh,” ong u Bah Nongrum ha ka dorkhas ba la phah sha u Myntri ka tnad kam pohïing ka Jylla, Bah Prestone Tynsong.
Kumban shu kdew hangne, katei ka la jia mar pyrshah ïa ka Bhutia Market kaba hajan Them Metor, bad kaba la saphriang ruh ha ki rynsan lad pathai bapher-bapher.
Na ka liang u MLA u la ai ka jingïaroh ïa ki briew jong ka aiñ kiba la pyrshang ban trei shitom na ka por sha ka por lyngba ka jingïoh kurup ïa kitei ki jingdih pynbuaid.
“Ka Sorkar ka dei ban pynkhlaiñ ïa ki tnad pulit bad ban pyntreikam da ka buit thymmai ban phong da ki riam kiba nym pynithuh ïalade ba ki dei ki briew jong ka aiñ bad ban pynkhlaiñ ïa ka jingïaid syntiat,” u la ong.
Ha kajuh ka por, u la kyntu ïa ka Sorkar ban pynkhlaiñ ïa ka aiñ (Narcotics Act) kaba long synjor kumba ka long mynta.
“Hooid khlem pep kan dei ka jingïatreilang na baroh ki liang, hynrei ka Sorkar kum ka kmie ka dei ban pyntreikam pyrkhing ban khang lad ïa ka jingwan rung laitluid jong kine ki jingsniew sha kane ka Jylla. Kan long leh noh ei bad sep ei lada ngi trei bor bah napoh hynrei ka jingpyrkhing pat kam don bad ki jingsniew kin nang ïoh ban rung laitluid,” u la ong.
U Bah Nongrum u la pynkynmaw ruh ha ki por jong ka COVID-19 ha kaba la don ka jingpyrkhing ïa ki briew baroh shuwa ban rung sha ki Jylla ban hap ban pyndep shuwa ïa ki kyndon ha Khyrdop Byrnihat.
“Lada ka Sorkar ka don ka jingkitkhlieh ïa la ka jong ka Jylla bad khamtam ka jingieid ïa ki khun samla kan pyntreikam kumjuh na ka Khyrdop Byrnihat, lym kumta kane ruh kan long kum kawei pat ka khlam ka ban ym lah ban ïoh ïa ka dawai ban pynkhiah,” u la ong.
