Shillong, Naiwieng 08
Ka Jylla Niam Bah Shillong ha ka Sngi U Blei ka la pynlong ïa ka Proseshon Ïukharist kaba shi sien shi snem ha kaba u Cardinal Filipe Neri Ferrãro, u la wan ban ïashim bynta lang.
La sdang ïa kane ka sngi da ka Mass Bakhuid kaba la pynbynta da u Cardinal Filipe Neri Ferrão ha ka jingdonlang u Archbishop ka Jylla Niam Bah Shillong, u Most Rev. Victor Lyngdoh, u Auxiliary Bishop, Bernad Laloo, ki Lyngdoh Sohblei na ki Parish bapher-bapher.
Haba pharia ïa ka ktien jong u Blei u Cardinal Filipe Neri Ferrão u la kyntu ïa ki paid ‘riewngeit baroh ban ñiew ïa ka jingïoh ban ïashim bynta ha kane ka jingrakhe kum ka burom kaba kyrpang. U la batai ba ka Proseshon Ïukharist ka long ka jingphla paidbah ïa ka jingngeit ba U Jisu Khrist u don shisha ha ka Sakrament Ïukharist Bakhuid Tam.
Da kaba ïaid lang bad ka Sakrament Bakhuid Tam lyngba ki surok, ki paid ‘riewngeit ki phla ba U Jisu Khrist u long U Trai bad u don hapdeng jong ka jingim jong ki.
Haba puson ïa ki kyntien jong U Jisu, “Phi long ka mluh jong ka pyrthei,” u Cardinal u la ong ba lyngba ka Sakrament Baptisma, uwei-pa-uwei u Khristan u long dkhot jong ka Balang bad u don ka jingkitkhlieh ban long u sakhi jong U Khrist ha la ki shnong, bad ha ka imlang-sahlang.
U la khot ïa ki ‘riewngeit ban puson katno ki ïajan bad U Jisu, kumno kata ka jingïajan ka pynwandur ïa ka jingim jong ki bad kumno ki lah ban pynpaw ïa la ka jingngeit lyngba ki kam.
U Cardinal Ferrão u la kyntu ïa ki ‘riewngeit ban pynkhlaiñ ïa ka jingïadei kaba jan bad U Jisu. Haba pynkynmaw ïa ka jinghikai jong U Khrist ba kito kiba ïaineh ha U kin seisoh shibun, u la kyntu ïa ki ban pule ïa ka Bible man la ka sngi, ban puson ïa kaei kaba ki pule bad ban shah ïa ka Ktien U Blei ba kan btin ïa ki haba ki shim ïa kano-kano ka rai.
U la kyntu ruh ïa ki longïing-longsem ban buh por na bynta ka jingduwai hapdeng ki kam ba man la ka sngi. U la ong ba ha ka jingduwai ki briew ki ïoh por ban sngap ïa U Blei, ban pynpaw ïa ka jingieid bad ka jingsngewnguh jong ki, bad ban aiti ha U ïa ki jingkhuslai jong ki. U la pynshlur ïa ki ban duwai marwei-marwei bad ban duwai lang kum kawei ka longïing.
U Cardinal u la batai ba ha ka jingrakhe ïa ka Ïukharist, ki ‘riewngeit ki ïakynduh ïa U Khrist uba im. U la kyntu ïa ki ban pdiang ïa ka Komunion Bakhuid da ka mynsiem kaba kloi ban shah ïa ka jingdon jong U Khrist ba kan pynkylla ïa ka rukom im jong ki.
Ha kaba ïadei bad ka jinglong ba la pynkhreh ha ka mynsiem bad ka jinglong sakhi ha la ïing bad haba kdew sha ka pharshi ha ka Kospel shaphang ki samla kynthei kiba stad bad kiba bieij, u Cardinal Ferrão u la pynkynmaw ba ki samla kynthei kiba stad ki la rah ïa ka umphniang na bynta ki sharak jong ki katba ki dang ap ïa u nongleit kurim. Kiwei pat ki la wan khlem da pynkhreh. Lyngba kane ka pharshi, u la kdew ïa ka jingkitkhlieh jong iwei-pa-iwei ban sumar bad pynkhlaiñ ïa la ka jingngeit, bad ban ïaineh ha ka jinglong ba la pynkhreh ha ka mynsiem.
U Cardinal u la ong ba u soh jong ka jingïajan bad U Khrist u dei ban paw nyngkong eh ha la ïing. U la kyntu ïa ki longïing-longsem ban pynlong ïa ka ïing ka jaka kaba don ka jingieid, ban ïamap haba mih ka jingïapher jingmut bad ban ïarap iwei-ïa-iwei. U la ong ba kito kiba jan tam bad ki dei ban ïohi ïa ka jingngeit jong ki na ka rukom ba ki ïadei bad ïaleh iwei-ïa-iwei.
Ha kaba kut jong ka Mass Bakhuid, u Cardinal u la pyllait paidbah ïa ka Shithi Sharai jong ki Lyngdoh Sohblei sha ki paid ‘riewngeit hapdeng ka jingdon u paid ‘riewngeit ba bun byllien.
Ha ka nohphai sngi ki paidbah ‘riewngeit ka Balang Katholik ki la ïaid ïa ka Proseshon ha kaba la ïalam da ka diengphna bad bud sa ki Parish bapher-bapher ryngkat ka rwai bad duwai katba ki dang ïaid sawdong ka Laitumkhrah, hadien ba la dep ïaid ka Proseshon, u Archbishop ka Jylla Niam Bah Shillong, u Most Rev. Victor Lyngdoh, u la pynbna ba u snem 2027 un long u Snem ba kyrpang jong ki Samla ha ka Jylla Niam Bah Shillong bad la pynkut noh ïa u Snem ki ‘Riewngeit jong u snem 2026 uba ka Jylla Niam Bah ka buh.
Ha ka jingkren sha ki paid ‘riewngeit, u Archbishop u la phai kyrpang sha ki samla. U la ong ba ka Balang ka ieid ïa ki bad ka don ka jingkyrmen kaba khraw ha ki. U la kyntu ïa ki ban mih shakhmat haba ka Balang ka donkam ïa ki, ban ïada ïa ka Balang bad ban long kiba shlur ha ka jingim jong ka jingngeit.
U la pynkynmaw ïa ki samla ba U Khrist u long uba jop, bad u la kyntu ïa ki ban pynskhem ïa la ka jingngeit, ban long kiba duwai bad ban ïaleh ban jop ïa ki jingtynjuh jong ka pyrthei. U la kyntu ruh ïa ki ban long kiba stad ha ka rukom pyndonkam ïa ki rynsan ‘media’, ban sumar ïa ka jingim ba kynja mynsiem bad ban long kiba jai-jai haba ki ïakynduh ïa ki jingeh.
Ha kane ka sngi u Cardinal u la kyrkhu ïa ki paid ‘riewngeit bad duwai kyrpang ba ka jingngeit kan dang khlaiñ shuh-shuh bad kin long ruh ka nuksa kaba bha na ka bynta kiwei.
