Nongstoiñ, Naiwieng 08
Ka jingdon jong ki seng lane ki kynhun kiba sngewkhia ïa ka khia ka shon jong ki paidbah khamtam ha ka pang ka shitom, kan long lehse ka jingkyrkhu kaba khraw ïa ki paidbah ka thaiñ, khamtam ïa ki nongshong shnong na ki shnong ki bym pat don ïa ki surok kiba biang kiba kynduh ha ka pang ka shitom.
Ka Shallang Area Traders Association (SATA) wat hapdeng ki jingeh ha ka jingïaid lynti ka jong ka, namar ka jinghiran ha ka khaïi pateng kala mih shakhmat bad da ka jingïanoh synñiang jong ki para dkhot, ha ka sngi Saitjaiñ jong ka taiew kala ïoh ban pyllait paidbah ïa ka kali kit nongpang (Ambulance) ha ka jingïalang kaba la pynlong ha madan Joplang Higher Secondary School, Shallang.
Ïa kane ka Ambulance, la khap ribon kum ka dak jong ka jingpyllait paidbah da u MLA ka thaiñ Bah Methodius Dkhar kum u kongsan ha ka jingdonlang u Bah Elius Nongbri bad u Phibing Sangma kum ki symbud kongsan lem u Bah Witting Mawsor, Bah Gigur Myrthong kiba long ki MLA barim ka thaiñ, Bah Sraly Rashir MDC ka thaiñ, Bah Shiningstar Riangshiang President ka SATA, u Fr. Markus Lakra Sacred Heart Parish Shallang uba long ruh u Parish Priest uba la shim ruh ïa ka bynta ban kyrkhu kyrdoh ïa ka kali shwa ban pyllait paidbah, u Fr. A Marzo, ki riew rangbah, ki longkmie, ki dkhot ka SATA bad kiwei kiwei.
U Bah Methodius Dkhar haba kren kum u kongsan ha kane ka sngi, u la pynpaw ïa ka jingai khublei ïa ka Shallang Area Traders Association kaba la trei shitom ban pynïoh ïa ka kali kit nongpang ka ban ai ka jingshakri ïa ki paidbah nongshong shnong jong ka dong ka thaiñ.
U la ong, “Kumba ngi tip bad sngewthuh ba ka koit ka khiah ka long ka bynta kaba kham kongsan tam ha ka jingim ka jong uwei pa uwei bad nga ngeit ba kane ka Ambulance kan sa lah ban ai ka jingshakri ïa ki paidbah khamtam ïa ki shnong kiba mad ïa ki jingeh, ki shnong kiba kham shitom ban poi da ki kali ki bym don four-wheel, hynrei kane ka kali ka lah ban ai ka jingshakri kaba bha.
U la ïathuh ruh ba na ka liang jong u, hadien ba la ïoh ban thaw ïa ka Sorkar hapoh ka Jylla nalor kiwei kiwei ki jingdonkam ba ka Mawshynrut Constituency ka donkam, u khmih lynti bad u tip ba ka koit ka khiah ka dei kawei pat ka phang kaba ki paidbah ki donkam ban pynleit jingmut bad ban wallam ïa ki jingkylla.
“Nga pynpaw ïa ka jingsngew kmen bad nga ai khublei ïa u Myntri Rangbah ka Jylla u Conrad K Sangma kumjuh ïa u Myntri ka tnad ka koit ka khiah ka Jylla kiba la pynïoh ïa ka mang ïa ki katto katne ki PHC bad ki sub centre bad nga sngewbha ban pyntip ba ngi la ïoh sanction kumba 19 tylli ki sub centre hapoh ka Mawshynrut Constituency,” ong u Bah Methodius da kaba bynrap ba saw tylli ki sub centre ki dei kiba don marjan bad ka Shallang.
U la ong ruh ba nalor ki sub-centre la ïoh ruh ïa ka jingmynjur na ka bynta ka Ayush Hospital ha Shallang bad ïoh ruh ïa ka jingthung kam ïa u doctor Ayush ha Shallang.
U la ong, ha kane ka snem, ha u bnai Lber, la ïoh ïa ka jingmynjur pisa na ka bynta ban shna ïa ki ar tylli ki jaka sah ki doktor (quarter) ha Shallang PHC ha ka mang pisa kaba 40 lak tyngka. Nangta u la ïathuh ruh ba ha u bnai Risaw (October) uba dang shu dep, la la ïoh pat ïa ka jingmynjur ban tei ïa ka building kaba thymmai na ka bynta ka Shallang PHC, kaba shongdor 1 klur 43 lak tyngka, shuh shuh u la ong ruh ba, kumba long ha Riangdo ïa ka Riangdo PHC la lah ban pynkiew kyrdan (upgrade) sha ka FRU (First Referral Unit) bad kine ki dei ki kam kiba la lah ban leh na ka bynta ka koit khiah.
“Ngi don hangne ngin nym sngewpher ha la ki jong ki jong ki party, ngi don HSPDP, TMC, Congress, NPP bad kiwei kiwei ki seng saiñpyrthei hynrei kaba nga kwah ka long ba ïa ki kam saiñ hima ngin ïakren da la dei ha ka por ilekshon hynrei kam dei ha ka kam khaïi-pateng, ha ka imlang-sahlang, ha ka niam bad ka shnong ka thaw. Hynrei, baroh ki kam shnong kam thaw, ki kam niam, bad kiwei pat ki kam paidbah ki dei ban ïaid shakhmat da ka mynsiem jingïalong shipara, ka jingïatreilang, ka jingieit bad ka jingïaburom markylliang, hangta yn sa lah ban kiew bad pynrulong ïa ki jingangnud na ka bynta ka konstitwensi,” ong u Bah Methodius bad ha kaba u la bynrap “Namar lada ngi shu ïatan tyllai lada ngi ïa bishni than iwei ïa iwei ngin sa shem jingeh bad kiwei ki briew kiba nabar kin sa shimkabu.”
