Nongstoiñ, Naiwieng 08
U District Magistrate ka Eastern West Khasi Hill District u Bah G Kharwanlang, IAS, u la pyntreikam da ka kyndon 144 CrPC kaba khang bad mana pyrshah ïa ka jingkyntur pud ha shi lynter jong ka surok bah Shillong-Nongstoiñ NH-44 (E) kiba hap hapoh ka Eastern West Khasi Hills District.
Ha ka kyrwoh khubor ba la phah, u District Magistrate u la ong ba kane ka jingkyntur pud ha shi lynter ka surok bah National Highway ka wanrah ka jingthut ïa ka jingïaid ki kali bad khamtam ba ka jingpyntrei ïa katei ka projek ba dang ïaid shaid-shaid kan ym dkoh. Shuh shuh u la ong ruh ba kino-kino kiba ïaleh pyrshah yn pynshitom ïa ki katkum ki kyndon jong ka aiñ, Kane ka hukum kan treikam mardor tat haduh ban da pynbna da kumwei pat.
