Shillong, Naiwieng 08
Wat la ki la don kiba pyrshah ban pynkut ïa ka tamasa Cherry Blossom ha ka Sngi U Blei kaba dei ka 19 tarik Naiwieng, 2023 hynrei ka jingpynkhreh jingpynkhrum ïa kane ka tamasa ka ban sdang naduh ka 17 tarik mynta u bnai Naiwieng ka la ïaid shaid-shaid.
Ha ka jingjurip u nongthoh khubor U Nongsaiñ Hima, la ïohi ba la dep shna ïa ki dukan da ki siej bad kaba sah mynta ka long sa tang ban ker bad tap.
La ïohi ba ki kali puh shilum ki la bun kam ban pyndap khyndew ha ka madan kaba long thliew.
Nalor nangta la ïohi ba ki nongtrei ki dang bunkam ban ker da ki tin ha sawdong ka madan ban suk haba khrong pisa ïa kiba wan peitkai sha kane ka tamasa.
Nalor nangta ïa ka rynsan ban ïa shad ïa rwai la ïohi ba ki nongtrei ki la pynkhreh ïa ki tiar ki tar ban shna ha syndah ka gallery kaba ju shong haba pynlong ïa ka jingïalehkai phutbol.
Shuh shuh la ïohi ba ki kynthei kiba don palat 16 ngut eiei ki la bun kam ban pynkhuid ïa ki plastik kiba la bret ha kane ka madan.
Wat la kane ka tamasa la ai kyrteng Cherry Blossom, hynrei ki nongtrei ha kane ka madan kiba dei na ka shnong Bhoirymbong ki pynpaw ba kim shym la ïohi ïa une u jait dieng ha kine ki thaiñ.
Haba ïakren bad u dkhot ka Dorbar Shnong Bhoirymbong, Bah Ebarlan Rympei, u la ong ba ki don tang khyndiat ngut kiba pyrshah ban pynkut ïa ka tamasa ha ka Sngi U Blei lait nangta bun ki la pdiang lut.
U la ïathuh ba naduh ba wan kane ka tamasa la ïoh ban maramot ïa ka surok hapoh shnong bad ka sorkar ruh ka la siew da ka pisa sha ka shnong haduh T.3 lak shwa ban sdang kane ka tamasa.
Nalor kane u la ïathuh ba ka jingwanrah ka sorkar ïa ka tamasa sha Bhoirymbong ka dei namar ka kylluid ka jaka ïeng kali.
Shuh shuh u Bah Rympei u la ïathuh ba hapoh shnong u dieng Cherry Blossom un nym don hynrei u mih pat harud jong ka shnong Bhoirymbong.
